Ufuna izimpendulo owavuka ezingubeni kaTira engazi
Phila Luthuli
BAHLUKENE phakathi ngemibono abantu ezinkundleni zokuxhumana mayelana noDJ Tira osolwa wesifazane ngokuvuka ezingubeni zakhe engazi.
Ezinkulumweni eziphakathi kwaTira noLuke, uMakoya oshadelwe uyaxolisa ngakho konke.
Ngiyaxolisa Luke kuwo wonke amagama engawakhuluma angakaze abe mahle. Bekufanele ngikunike isikhathi ngikuhloniphe futhi. Ngiyaxolisa akufanele ngabe udlule kulokhu odlule kukho. Ngizimisele ukunika elinye ithuba sisebenze sikhulise umculo wakho. Kukhona okulungayo? Ngicela ususe imibhalo yakho,” kuncenga uTira.
ULuke uphendule ngokuthi akamnike isikhathi ngoba naye kade wayebekezele.
“Nginombuzo la, uyazi ukuthi angikaze ngikuthande kusukela uzama ukushela siphuma eCarwash, ngavuka kanjani ezingubeni zakho? Kwenzekani ngalolo suku. Ngicela ungaqambi amanga khetha amagama wakho ozowasho,” kuphendula uLuke.
Kule ngxoxo yabo uTira uphetha ngokuthi acele ukuthi babonane ubuso nobuso.
Kwenye yezingxoxo kuWhatsApp uTira unxenxa uLuke ukuthi amukele uR25 000 kuthi omunye uR25 000 usetshenziselwe umculo nokushutha imusic video wale ntokazi.
“Uma ungasathandi ukusebenza ne-Afro singaluqeda lolu daba ngokuthi uthathe uR35 000. Ngicela siqede ngale ndaba,” kubhala uTira.
ULuke uphawule ngokuthi : “Ngisakunika esinye isikhathi ukuthi wenze uphenyo noma kubangani bakho asebeke babhekana nalesi simo ukuthi basixazulula kanjani, ucabangisise ukuthi uthini kimina,” kuphendula uLuke.
USabelo kwiX ubuze ukuthi kungani le ntokazi ingavukanga yayobika udaba emaphoyiseni?
UKings Janes uthe osaziwayo kumele bafunde ukuthi ukuthinta owesifazane ngendlela engamukelekile lokho kungasho ukuphela kwekusasa labo. UMoshe uthi uLuke ufuna isamba semali uTira kumele aphukele obala ukuthi Kwenzekani akukho okuzomlahlekela.
