I-2K lilandelwe izindondo zePSL noma seliwelile

U-Relebohile Mofokeng ube yingqwele engenantanga kumaPSL Awards ka-2025/26 ngoMsombuluko ebusuku.

Uhlomule ngezindondo ezintathu ezinkulu.

Lo mdlali oneminyaka engu-21 ubudala, usesayine neqembu laphesheya kwezilwandle ngemuva kwesizini enhle abe nayo.

Uklonyeliswe ngePSL Footballer of the Season ngemuva kokwenza kahle kakhulu egqoke ijezi le-Orlando Pirates.

Uphinde wanqoba izindondo zeBetway Premiership Players’ Player of the Season neBetway Premiership Young Player of the Season, waqeda ubusuku enezindondo ezintathu.

Ompetha beBetway Premiership, i-Orlando Pirates, baphinde bagqama kwezinye izindondo.

Umqeqeshi u-Abdeslam Ouaddou uqokwe njengeCoach of the Season, kwathi uSipho Chaine wanqoba eyeGoalkeeper of the Season.

ULebone Seema uqokwe njengeDefender of the Season, kwathi u-Oswin Appollis waba yiMidfielder of the Season.

UCamren Dansin yena uwine indondo yeGoal of the Season.

Unozinti osewathatha umhlalaphansi, uDarren Keet, uklonyeliswe ngeNedbank Cup Player of the Tournament ngemuva kokusiza iDurban City ukunqoba le ndebe.

USeluleko Mahlambi weTS Galaxy uthole indondo yeMost Promising Player of the Tournament.

Owayengumdlali wePirates, uMbekezeli Mbokazi, uwine eyeCarling Knockout Player of the Tournament, kwathi uTshepang Moremi yena wahamba neyeMTN8 Last Man Standing.

ICape Town City ibuse ezigabeni zeMotsepe Foundation Championship, lapho u-Emile Witbooi, uGabriel Armato noMickey van der Hart benqobe khona izindondo ezahlukene.

KwiDStv Diski Challenge, umdlali weMamelodi Sundowns uBennet Mokoena unqobe zombili izindondo, okuyiPlayer of the Season neTop Goal Scorer.

Onompempe nabo baklonyelisiwe, lapho u-Eugene Mdluli eqokwe njengeReferee of the Season, kwathi uNandipha Menze wahlonishwa nge-Assistant Referee of the Season.

Lisenethini.co.za