Izimpendulo ngoyise kaSweet Guluva
ISIPHENDULEKILE imibuzo ebihlezi isezindebeni zabaningi ukuthi ngubani uyise wesihlabani u-Akhonamathemba “Sweet Guluva” Mbhele
USweet Guluva usanda kuhlabana kwiBig Brother Mzansi S5 Umlilo ngesamba sika-2 million.
IPurpose isingakuqinisekisa ukuthi uGuluva uzalwa ngowayengumculi weKwaito eThekwini ongasekho emhlabeni uWaya 77 ogamalakhe langempela uMlungisi Mbhele.
Lezi zindaba zivele ngesikhathi eyisimenywa endaweni yokudlela nobumnandi iBrown Sugar eMhlanga.
UGuluva ukuqinisekisile ukuthi impela uWaya 77 unguyise ongasekho emhlabeni kanti uyacabanga ukuthi nekhono lokucula ulithole kuyena.
Kuzokhumbuleka ukuthi uWaya 77 wake wakhipha ingoma ngokubambisana noPhuzekhemisi esihloko sithi Ubuhle neyathola weni eyahmoya emisakazweni ehlukene emzansi.
Ekhuluma enkundleni yokuxhumana iTikTok ngoLwesithathu uGuluva uthe, usexoxile neMeya yaseNquthu uMnuz Zama Shabalala mayelana nomcimbi wakhe.
UGuluva ubonge bonke abamvotelile nabamesekile ngesikhathi engaphakathi kulolu hlelo.
Ikhuluma kwi-video eqoshiwe iMeya uShabalala, iqinisekisile ukuthi impela zikhona izinhlelo zomcimbi kaGuluva eziqhubekayo. UShabalala unxuse abantu ukuba baphume ngobuningi ukuyokwamukela uGuluva osephenduke iqhawe eNingizimu Afrika, ikakhulukazi kubantu baKwaZulu-Natal.
UGuluva udalule ukuthi uzimisele ukungena emkhakheni wezokungcebeleka ngemuva kokunqoba kwakhe, waveza nokuthi uyazifela ngomculo nangokulingisa.
