Zehle ‘mi’ kuL’vovo olahlekelwe yikho konke
Liyakhiza Mseleku
Bezehla mi izinyembezi kwisihlabani somculo weKwaito uL’vovo Derrango ohlelweni lukaLinda Sibiya iSunday Devotion kwiGagasi FM.
UL’vovo ubechaza ngesimo sempilo yakhe ebuthaka nokushiywa abangani.
“Ngibe nesibindi sokufika ngizokhuluma ngempilo yami phambi kwabantu. Ngiphilile impilo emnandi enhle ngaba nakho konke, kwahamba konke,” kubalisa uL’vovo echiphiza izinyembezi.
“Ngifikelwa izinyembezi Mr Magic ngoba ngiyazi lapho ngiphuma khona. Ngiyabazi ubunzima engiphuma kubona nami angazi ngibuye kanjani. Kodwa ngokuthemba uNkulunkulu ngila ngikhona. Nginesbindi sokuzokhuluma phambi kwabantu ngempilo yami. Ngiyiphilile impilo emnandi kwahamba konke abantu baqala baqhela eduze lwami. Kodwa ke uNkulunkulu wathi mfana wami akukapheli ngawe.
“Wathi uzobuya futhi kodwa uzobuya usukhaliphile usuwazi ukuthi yikuphi okufanele nokungafanele. Ungazondi muntu ungafiseli muntu okubi kodwa uqaphe eqolo njengonwabu,” usho kanje.
Wengeze ngokuthi waphoqeleka ukuthi abuyele ekhaya eNewcastle ngoba edinga umuntu ozomsiza. Uthi wayengaphumeli ngaphandle ngoba esaba abantu ukuthi bazothini.
“GROOTMAN lami, qhawe lami, Mongo, Gatsheni ❤️ Kuzolunga🫶🫡” kududuza umculi weHip Hop uZakwe.
“Uphi uTira kanti ngoba ngicabanga ukuthi kumele angenelele,” kuphawula uSakhile Mtho Duma.
UL’vovo usanda kuphumela obala ngokushaywa isifo sohlangathi ngesikhathi kunomuntu ozenza yena enkundleni yokuxhumana kwiX.
Waveza ukuthi akekho nhlobo kuX usalwelwa impilo yakhe njengoba ebuthaka.
Marketing and advertising Call or WhatsApp 073 062 1169
