Kudutshulwe umsebenzi kaMasipala kwaMashu

Aphelele Gcwabe 

KUDUTSHULWE kwabulawa owesilisa esendleleni ebheke emsebenzini kwaBester, kwaMashu, ngoMsombuluko ekuseni.

UMnuz Zamiso Otto Ngcobo (33) ubesebenza njenge-Life Guard kumaSwimming Pools akwaMashu ngaphansi kukaMasipala waseThekwini.

Ube esetholakala edutshuliwe amahlandla amaningi ekhanda ngesikhathi kufika abosizo lokuqala.

Eduze kwesidumbu kutholakale amagobolondo ezinhlamvu zohlobo lwesibhamu i-9mm. Inhloso yokubulala ibingakaziwa kanti nabasolwa kabaziwa.

Ngokombiko wenkampani yonogada iReaction Unit South Africa (RUSA) ebisendaweni yesigameko umndeni uthi mufi ubenesibhamu esisemthethweni esithathiwe naso.

Kulezi zinsuku zandile izigameko zokuchitheka kwegazi esizibikiwe ezenzeka kuleli lokishi.

Khonamanjalo kubikwa ukuthi owesilisa udubule wabulala abesifazane abayizelamani ababili, maqede wazigqokloza naye ngenhlamvu eLindelani, eMzinto, ngeSonto ntambama.

Okhulumela amaphoyisa aKwaZulu-Natal uConst Thenjiswa Ngcobo uthe kulesi sigameko, umufi udubule nowesifazane wakwamakhelwane.

Ube esephuthunyiswa esibhedlela esesimweni esibucayi.

Uthe amaphoyisa aphenya amacala amabili okubulala, nelilodwa lokuzama ukubulala, kuvulwe nedokodo ngokufa komuntu.