Umculi oxinwe ukugula uswele usizo lwemali
UMNDENI womrepha uDa LES oshaywe i-stroke usunxuse umphakathi ukuthi uwusize ngokuqongelela imali yokukhokhela izindleko zesibhedlela.
Umndeni uthumele isitatimende esishiye abaningi bedangele uveza ukuthi lo mculi ubanjwe ilokhu kugula ngoLwesihlanu.
Unina uPriscilla Mampe uthe indodana yakhe isesibhedlela esiseJohannesburg wacela kunoma ubani uMsamariya olungile ongasiza nganoma imalini ukukhokhela izindleko zokulashwa kwakhe.
Sekuvele nemibiko ethi abasondelene noDa.L.E.S sebeqalile ukuhlanganisa amakhanda badudana ngokuthi kumele kuqongelelwe imali ifakwe kwi-akhawunti kamama walo mculi.
Umthombo uthe unina walo mculi uphoqelekile ukuthi ashiye konke akwenzayo phesheya e-United States of America azokweseka indodana yakhe.
Lo mculi oseke wakhipha inoni elithi All Eyes on Me, usefiselwe ukululama ezinkundleni ngozakwabo abahlukene.
Phakathi kwabo kuno-Ishmael Marobe owake wacula ndawonye naye noCrazy Lu noBongani Fassie eqenjini leHip Hop elashisa izikhotha iJozi, uJ Ankletap, Manu Worldstar noLalla Hirayama.
U-Da L.E.S wake wabasematheni eminyakeni emibili edlule ngesikhathi kuvela ukuthi unina wengane yakhe ubentshontshana nomrepha u-AKA, ayezwana naye kakhulu.
Lezi zindaba zavela kusanda kushona intombi ka-AKA (owadutshulwa ngonyaka odlule eThekwini) u-Anele Tembe. Kuthiwa nguye uTembe owaqhumbuza ithumba ebhalela incwadi uMacG wodumo lwePodcast eqhulula amahlazo abo.
Nokho zombili izinhlangothi zazichitha lezo zinsolo, nokuyinto eyahunyushwa ngokuthi zifuna ukuvikela imindeni yazo.
