Ufuna ubulungiswa umndeni kamshayeli we-Uber obulawe esetohweni
Sihle Mkhize
Ufuna ubulungiswa ukuze usuleke izinyembezi umndeni kaBandile Hopewell Nkambule.
UNkambule wadutshulwa kathathu wabulawa ehamba nomngani nentombi emgwaqeni ongena eDaggakraal ku-N11, phakathi kweVolksrust neDaggakraal, esifundazweni iMpumalanga.
Ubulawa nje umsolwa osesithombeni esingenhla wayesebenza njengo-Uber ehamba ngemoto yohlobo lweRenult Triber enezihlalo eziyikhombisa.
Wamiswa amadoda amabili ecela ukugibela emotweni bavumelana ukukhokha phakathi kwaR20-30 umuntu emunye. Kuthe sebehla emotweni oyedwa wadonsa isibhamu wadubula umshayeli.
Umalume kamufi uJabu Dube, ekhuluma nePurpose eVolksrust, eMpumalanga, uthe bafuna ubulungiswa bewumndeni kuphenyisiswe nomngani kamufi.
“Sifuna kwenzeke ubulungiswa akatholakale umbulali nalo ayehamba naye, ngoba kuyacaca lababantu babethunyiwe,”
“Abazange bayithathe imoto engathi baphazanyiswa umlungu owayedlula ngemoto, umngani kamshana nentombazane bona abazange badutshulwe,”
“Isitatimende somngani wakhe asicaci kahle engathi kukhona akwaziyo akufihlayo,”
“Uthi abasolwa babaleka bangena esigangeni, yena wathatha umshana wambeka esihlalweni eceleni wajikisa imoto wayishayela beza naye, Emajuba Memorial Hospital,”
“Okukuqala akakwazi ukushayela, useyashintsha uthi umufi owayeshayela imoto beya esibhedlela, uyaphinda uthi yena makudutshulwa umshana wabaleka wayocasha” kulandisa uDube.
Umufi wadutshulwa ngomhla ka-30/05/2026 eneminyaka engu-25 ubudala washiya emhlabeni ingane yentombazane esencane.
Icala lavulwa esiteshini samaphoyisa eVolksrust kanti liphethwe umseshi uShabalala.
Marketing and advertising Call or WhatsApp 073 062 1169
