Kunqamuke imbadada eMachunwini zibambene
Liyah Mseleku
Beyidida unwabu imibala ebekuhlobe ngayo ababehambele Ingoma YasemaChunwini eMqamathi, enhla nesifundazwe sakwaZulu-Natal.
Amaqembu angaphezu kwagama-35 asine ededelana eshiyelana inkundla kwanqamuka nezimbadada kwabanye.
UMakhuzwayo Mkhize ongumsunguli weNgoma YasemaChunwini uthi besungula lengoma ngo-1996 babehlose ukuthi ihlanganise zonke izizwe zamaChunu futhi ishintshe ukubukwa kwamaChunu njengabantu abanolaka.
“Ngasungula le Ngoma emuva kwezimpi zesepolitiki ngabheka ukuthi uma ziphela lezimpi kuzobuyelwa ezimpini zezigodi. Kwabe sekufika ukuthi ngihlanganise sonke izigodi zesizwe samaChunu”
“Iphupho lami kwakuwukuthi ushintshe uMsinga njengendawo ekwakuthiwa inamawala. Nakhu ke sekuyenzeka manje. Lento isekwesinye isigaba ngendlela abantu abasha abayiphusha ngayo,” kuphawula uMkhize.
Inkosi uNgangendlovu Mchunu uthi Ingoma YasemaChunwini iyithuba lokuthi isizwe sihlalisane kahle ngaphandle kwempi.
“BaNguni le ngoma isuka Jude kakhulu. Ngicela siyihlonile le Ngoma, kunokuthi ime ndawonye ngicela ithuthuke. Ngicela futhi ukuthi ihloso yayo ifezeke njalo”
“Ngoba ihloso enkulu akusikho ukuphuza utshwala sibone amatshitshi sishele, kodwa ngayo siqonde singakwebhani noma sila emakhaya sihlale ngokuzwana,” kuphefumula Inkosi.
Lengoma ingenye yezingoma ezesekwe uMnyango Wezemidlalo, Ezobuciko Namasiko njengelinye lamaqhinga okukhuthaza uzwano nokuphilisana kahle kwemiphakathi.
