Igidigidi uMihlali efonela indoda kawu-78 ingalubambi
KUBUKEKA kuphelile phakathi kukanontandakubukwa uMihlali Ndamase nosomabhizinisi uLeero Sidambe.
Lokhu kulandela ukuvela ukuxabana okungapheli nokusetshenziswa kwezidakamizwa.
Ekuqaleni kwesonto lezi zithandani zibe sezinkundleni zokuxhumana kulandela ukuthi uMihlali efake isithombe sakhe elimele udebe eshayeke nasesiphongweni ku Instagram.
Abantu bakhwele badilika kuLeeroy bemsola ngokuba umhlukumezi.
Nokho ngoMsombuluko lo mlisa udedele isitatimende eveza ukuthi uMihlali wake wazama ukumgwaza kodwa wahlengwa indodana.
Ubuye waveza ukuthi uMihlali ubevamisile ukuthi afune ukudla amfele njalo uma esedle izidakamizwa.
“Ngomhla ka 8 August uMihlali Ndamase uke wazama ukungithinta ngocingo izikhawu eziwu 78 wangangithola ngoba ngase ngizumekile. Wasuka lapho uMihlali watheleka emzini wami waphoqa indodana yami ukuthi imvulele ngenkani. Ngokukhumbula komfana wami wafika waqonda ekhishini wabuya nommese efuna ukungigwaza ngoba engisola ngokuthi angithembekile. Ngoba ngizivikela ngamdudula wawa kabuhlungu washayeka nasodongeni. Ngalanyulelwa umfana ngoba ezwa ngimemeza ngifuna usizo. Ngifuna abantu bazi namhlanje ukuthi sekunesikhathi eside uMihlali engihlukumeza abuye acekele phansi nempahla yami ikakhulukazi uma esedle izidakamizwa. Bakhona futhi nofakazi.” NoMihlali ukhiphe esakhe isitatimende eveza ukuthi ubewukudla kwenduku kulolu thando iminyaka emibili.
Uthe nokho akazimisele ukuveza ubufakazi ngoba usezimisele nokuqhubeka nempilo.
USidambe wehlukana nomkakhe uMary Jane eminyakeni emibili kwathi ngonyaka odlule kwavela ukuthi yena nale ntokazi elandelwa kakhulu kuYoutube nakwezinye izinkundla zokuxhumana bangamathe nolimi.
ULeeroy Sidambe noMihlali Ndamase ngezikhathi zakudala besathandana
