Zikhala nxazonke kubasakazi boKhozi FM
Philasande Luthuli
Sekuphelile obekuhlanganisa umsakazi woKhozi FM uTshatha Ngobe nethimba elihlela indumezulu yomcimbi iMpucuzeko Music Festival.
Lo mcimbi osuzakhele isasasa usubekhona iminyaka engu-12 kanti uNgobe ubebambisene noXolani Mcineka ekuhleleni lo mcimbi.
Abalandeli nabathandi baMaskandi baqale ukuqaphela ukuthi kukhona okushaya amanzi ebudlelwanewni baNgobe noMcineka ngoSeptember ngonyaka odlule.
UTshatha ungene ezinkundleni zokuxhumana wamemezela ukuthi usethi khumu ekubeni ngomunye wabahleli walo mcimbi waminyaka yonke obanjelwa ePeoples Park, eThekwini.
Ushiya nje uTshatha usanda kuhlela indumezulu yomcimbi wakhe iTshatha Maskandi Festival.
“Emva kweminyaka eyishumi nambili ngingomunye wabahleli kanye nomunye wabasunguli balo mcimbi Impucuzeko Maskandi Festival, sengithi khumu ekubeni ingxenye yawo. Nakuba ngingenakuzidalula izizathu zokuhoxa kwami kodwa ngithi angikwazise njengomuntu olandela lelikhasi lami kule nkundla yokuxhumana,” usho kanje.
Khonamanjalo, uzakwabo kaTshatha uZimdollar onesikhathi eside engabhekani noWelile Mchunu useveze ukuthi abantu bayathunywa bamthuke.
“Bengingazi ke mina ukuthi abantu bayathunywa ukuthi bathuke abantu,” kubhala uZimdollar.
“Ngiyaxolisa ukuthi sesiside isikhathi lento yenzeka kodwa yima ngobona manje ukuthi kumele ngixolise. Noma ngikubona emcimbini ngiphatheka kabi ngithi lo sisi ngamthuka engenacala engakaze athi nxa kimi. Ngiyaxolisa kakhulu ukwehlisa isithunzi ngaleya minyaka. Ngifisa mfwethu ungixolele ngiyacela, ngiyazisola ngangimncane ngithunywa,” usho kanje kwivideo.
