Uvalo kunqamuka ukuthengwa kwagesi eThekwini
Amkelwa Nguse
UMASIPALA weTheku usumemezele ukuthi kuzophazamiseka ukuthengwa kwagesi kusetshenziswa ubuchepheshe kusukela ngoLwesihlanu kuze kube iSonto.
Ngaphandle kokuphazamiseka kokuthengwa kwagesi ngohlelo lwe-eThekwini Mobile App kuzophazamiseka nezokuxhumana, konke lokhu kuzoqala ngehora leshumi ebusuku kuze kube ihora lesine.
UMasipala usunxuse wonke amakhasimende wawo ukuthi athenge ugesi kunesikhathi ukuze ugweme le nkinga.
NgokwaMasipala lesi senzo siyingxenye yokugcinwa kwengqalasizinda ebalulekile okuhloswe ngayo ukuthuthukisa kohlelo lokuletha kwezinsiza.
Kwenzeka lokho nje, vele abahlali baseThekwini namaphethelo bebevele bethwele kanzima ngenxa yokunyuka kwezindleko zikagesi.
NgoJulayi 2024, iNational Energy Regulator of South Africa (NERSA) yagunyaza ukwenyuswa kwentengo kagesi ngo-15.1% kulo nyaka wezimali.
Ngenxa yalokhu, izindleko zikagesi nge-kilowatt-hora (kWh) kumakhasimende ahlala ezindaweni eziphakathi kwaMaspala weTheku sezibalelwa ku-R2.20.
Ukwenyuka kwamanani kwengeze ingcindezi emakhaya evele edonsa kanzima kwizindleko zokuphila.
UMasipala usuqinisekise umphakathi ukuthi ukulungiswa kwengqalasizinda kuzogcina kuholele ekutheni kube nosizo oluthembekile.
