Uswele umgodi wokucasha uNabi edliwa yiGallants
USWELE umgodi wokucasha umqeqeshi we-Kaizer Chiefs uNasreddine Nabi oseqalile ukunuka iqaqa kulandela ukuthola isibhaxu.
I-Kaizer Chiefs iphendulwe iminqolo ishayelwa ekhaya yiMarumo Gallants emdlalweni weBetway Premiership.
Lo mdlalo uphele ngo 2-1, kunqoba iGallants bewuseFNB Stadium ngoMgqibelo ntambama.
Ngemuva komdlalo, uNasreddine Nabi, onengcindezi exakile, uvele washaya isishwaphana sakhe wayosithela ezindlini zokushintshela.
Akabange esalinda nokuthi akhulume nabethelevishini ngokomthetho nempoqo yemithetho yePSL.
Bekumfanele ke nokho ukuduba ngoba leli qembu lakhe seliphumile kwayisishiyagalombili aphezulu kwiligi.
Emidlalweni engu-25 yeligi, iChiefs isanqobe eyisishiyagalombili kuphela, yahlulwa kwengu-11, yadlala ngokulingana eyisithupha.
Lokhu kuyishiya inamaphuzu angu-30, okuyibeka engcupheni yokuphinde isale ngaphandle kweTop 8 isizini yesibili kulandelana.
Amakhosi yiwona alishaye kuqala igoli kulo mdlalo. UGlody Lilepo ushaye elihle igoli, ededela ishodi ekude nepali.
Lo mgadli odabuka eDR Congo uqale ngokujika abadlali abathathu beGallants, esuka nabo ngakulayini.
Ube esengena ngaphakathi wadedela ishodi, walizwa ngendaba uWashington Arubi obesezintini zeGallants.
Nokho kuyiwe ekhefini sezibambene futhi kulandela ukuthi uMatome Mathiane eshaye elokulinganisa.
Igoli lakhe liqhamuke ngemuva kwephutha elenziwe unozinti weChiefs uBruce Bvuma ochithe ibhola walibeka phambi kwakhe eyedwa.
UBvuma uphinde wahlulwa yibhola ebelibukeka lilula esiwombeni sesibili nokuyilo elijuqe Amakhosi.
Bekuyibhola ebelibekwe phansi futhi likude nepali, uDaniel Msendami wazama ukuligoba kodwa laya ngqo epalini.
Alitholanga mdlali, kodwa noBvuma walibona sekwephuzile, wathi uyazama ukulilandela, lamshiya lakhala enethini.
Lisenethini
