Usizo kwabakhahlanyezwe yimvula ekhiphe isidumbu eMlaza
Philasande Luthuli
IZIMVULA ezinamandla ezikhahlameze izakhamizi zaseThekwini, eMlaza zidonse amehlo kaNgqongqoshe wezokubusa ngokubambisana neziNdaba zoMdabu KwaZulu-Natal uMfundisi Thulasizwe Buthelezi.
UButhelezi, ubehambele kuleli lokishi njengenye yezindawo ezikhahlamezekile kwaze kwaphuma nesidumbu.
Phakathi kwezinto azihlabile ngezakhimizi zaseThekwini ukwakha ezindaweni ezingagunyaziwe ngenxa yobungozi balezo zindawo.
Uveze lokhu evakashele eMlaza ngaphansi koMasipala weTheku ngoMgqibelo eyoveza amehlo ngenxa yezimvula ezikhahlameze imindeni ehlukahlukene kule ndawo.
Eminye imindeni emine elinyalelwe yimizi, uyithembise ukuyizamela izindawo zokuhlala ngokoxhaso lwezezinhlekelele olungaphansi komnyango wakhe.
Utshele abezindaba ukuthi useziqalile izingxoxo zokuxoxisana nomasipala weTheku nenkosi yesizwe sakwaCele ukuze kusizakale lemindeni.
IPurpose ibikile ngesidumbu esiphumile ngoLwesihlanu eMlaza.
Kuphinde kwalimala inqwaba kwadilika izindlu ngenxa yezikhukhula ezidalwe imvula elokhu ine njalo eKZN kusukela ngoLwesine.
Phakathi kwemindeni esale iyimitshingo ibethwa ngubani kuleli lokishi ehlala esigcemeni iChicago, kwa-AA section, J Section, ku Ward 78 ngaseskoleni KwaMgaga High School nakwezinye.
Ngomhla ka-23 April uMasipala weTheku wakhipha umbiko ngesexwayiso sezulu esikhishwe yiSouth African Weather Services (SAWS).
Lesi sibikezelo sezulu sakhomba ukuthi kuzoba nemvula enamandla elindeleke iKwaZulu-Natal yonkana. Idolobha laseThekwini lingelinye lezindawo ezichaphazelekayo ngalezi zimvula.
