Usemome owoMkhosi woMhlanga
UNGQONGQOSHE wezeMidlalo uBuciko namaSiko KwaZulu-Natal, uMhlonishwa Mntomuhle Khawula uthi akusekho ukujikela emva kwendlu.
Ukusho lokhu njengoba ususemome uMkhosi WoMhlanga walo nyaka ozoba sesigodlweni seSilo uMisuzulu kaZwelithini, eMachobeni ngempelasonto yomhlaka-4 kuya ku-5 kuMandulo.
Ngokwezinhlelo zoMnyango wonke amalungiselelo ebukeka emi ngomumo.
Lokhu kuvele emhlanganweni wezinhlaka zonke ebeziyingxenye yalo mhlangano obusemahhovisi kaMasipala eMkhanyakude ngoLwesibili.
Phakathi kwabebethamele lo mhlangano kubalwa, iNdlunkulu Nomzamo Myeni, oKaMdolomba, wasesigodlweni eMachobeni, uMntwana Thulani “Mnyovu” waseZibindini, amakhosi, onomehlo, abezokuphepha nabamele iMnyango yonke ethintekayo.
UMntwana uThulani udalule ukubaluleka kwalo mkhosi waseNgwavuma njengoba wasungulwa iSilo esibuzile iNgonyama uZwelithini kaBhekuzulu.
Wasungulwa ngemuva kokunxuswa amakhosi akulesi sifunda ekhala ngezinga eliphezulu lokukhulelwa kwabafundi ezikoleni zaseMkhanyakude eminyakeni eyishumi eyedlule.
IMeya ehola uMasipala wesiFunda uMkhanyakude uMhlonishwa Siphile Mdaka isizwakalise ukuthakasela lo makhosi.
Phakathi kwezizathu wukuthi lo mkhosi wenzeka ngesikhathi sokuqala kwenyanga yezokuvakasha namagugu KwaZulu-Natal lapho osomabhizininisi abafufusayo bethola ithuba lokuxosha ikati eziko.
Marketing and advertising Call or WhatsApp 073 062 1169
