Ungcwatshwe ngesizotha uNtshebe weZingane Zoma
Bahle Mkhize
Nakuba kube muncu ngemizuzu yokugcina ngesikhathi kukhishwa isidumbu selungu leZingane Zoma uBusani “Ntshebe” Khuzwayo sesiya emathuneni kodwa bekunenjabulo.
Owayengu Mengameli wakuleli uMnuz Jacob Zuma ubalwa nezihambeli eziqavile bezihambele lo mngcwabo kaNtshebe kwaGqulu, eQhudeni, KwaZulu-Natal.
Bekukhona noDr Zweli Mkhize, Jomo Sibiya, Thokozani Langa, Khuzani Mpungose, Ntencane, Mbuzeni Mkhize, Imithente nabanye abaningi.
UZuma uthe ubengalindele ukuthi uKhuzwayo usengasheshe ahambe emhlabeni kwazise ubesabheke lukhulu kuye.
“Le ndoda idlale indima enkulu ezimpilweni zethu singabantu abamnyama. Besingalindele ukuthi angasheshe adlule emhlabeni sisamangele,”
“Ngizitshelile ukuthi ngizofika ngizokhalisana nomndeni ngoba silahlekelwe iqhawe. Usifundise okuningi ngomculo,” kubeka uZuma.
Kuzokhumbuleka ukuthi Izingane Zoma zasisekhaleni ezimpini zikaZuma nezinkantolo.
Baze bakhipha i-album esihloko sithi Msholozi ngo-2006.
UThokozani Langa ekhulumela abaculi uthe ubenesisoka uNtshebe.
“UKhuzwayo uma ukhuluma nawe ubegoba azothe. Yingoba vele uma siyoqomisa intombi siyazotha ngoba intombi ayinandaba nemali yakho,”
“Futhi ayinandaba nobukhulu bakho wawuzotha ngoba uwe ozocela. Ngiyibonile iwalk kasbali. MaKhumalo, MaLanga anginisoli,”
“Nahlulwa okwakumele kunehlule nayibona leya walk ayinithatha yanibeka kwaKhuzwayo,” kusho uLanga ebhekise kubafelokazi baNtshebe.
“Ngikhulumela abaculi, bafwethu esinabo endimeni sonke ngicela siqine silithwale leli joka. Asizolinika bani, lisikiwe lathungwa ibhantshi lizowulingana umndeni wakwa Khuzwayo. Wahamba uNtshebe” usho kanje.
“OkwaNkulunkulu lokhu asithathe amehlo wethu siwabhekise phezulu ngoba usizo luyovela kuJehova,” eqhuba uLanga.
Imithombo esondelene nalesi simo ibike ukuthi uNtshebe bephethwe umlenze unesilonda esingapholi.
Kuthe ngokuhamba kwesikhathi wahlaselwa yisifo sohlangothi kwagcina kumenela esibhedlela eDundee.
NB: Marketing & Advertising WhatsApp/Call-073 062 1169
