Izinsongo uKhuzani kunikizwa igama lakhe
Sihle Mkhize
Umculi osanda kuhlomula ngendondo yeBest Maskandi kwiMetro FM Awards, uKhuzani Mpungose, ukhwele wadilika kwiBhinca Nation Podcast ethulwa uNgizwe Mchunu.
Kuzokhumbuleka ukuthi sekunesikhathi uMpungose noMchunu bengadli gqoko lunye.
Kulokhu uMpungose ukhala ngale Podcast kulandela ukuthi bekunesimenywa esisho ngokungahlonizi ukuthi sona asimboni lo mculi njengenkosi kaMaskandi.
Kuyaziwa ukuthi lo mculi wazibeka njengenkosi kaMaskandi futhi uhlezi ezishaya isifuba ngalokho.
“Mina angimboni uKhuzani njengenkosi kaMaskandi” kusho isimenywa kwiPodcast.
UMchunu unanele ngokuthi :”Good, loud and clear”
UMpungose wake wagadla kuMchunu wathi akanabafazi ekubeni eganwe amakhosikazi amathathu.
UMpungose ube esebhala ezinkundleni zokuxhumana ukuthi ngeke asonge izandla athule kunabantu abafuna ukuzakhela udumo ngamagama abanye abantu abawasebenzele kanzima.
“Lena kusiyo i-mafia state lapho kufanele sihlale sidelelwa sidicilelwa phansi bese sithula sisonga izandla ngoba kukhona abantu abafuna ukuzakhela udumo ngamagama abanye abantu abawasebenzele kanzima”
“Le podcast idicilele phansi igama lami, futhi ngizolwela igama lami ngendlela esemthethweni nangenhlonipho. Nginesiqiniseko ukuthi uMacG akanalwazi ngalento kusetshenziswa iPodcast yakhe ukuzama ukubulala igama lami”
“Kulandwa bonke abantu abangazwene nami ukuze bezongeneka besho abakuthandayo kodwa mina anginikwa ithuba lokuziphendulela. Ngaze ngenza i-interview kuBhanyazile wathi uzoyikhipha ngoJanuary kodwa mina ngibe ngisha manje nami ngizama ukuziphendulela”
“Igama lami akuyona into yokudlala. Mina ngizimisele ukuvikela igama lami, umsebenzi wami, nabantu abangisekelayo”
“Ngicela nizwelane nami kangithandi, ngibhala lana nje angithandi ngibuhlungu enhliziyweni yami bafwethu, sekwanele” kuzikhalela uMpungose.
Marketing and advertising Call or WhatsApp 073 062 1169
