Sekuphinde kwagadla ukufa kushona oweZingame Zoma
Philasande Luthuli
Sekuphinde kwawa umuthi omkhulu endimeni kaMaskandi kushona omunye wabasunguli beqembu likaMaskandi Izingane Zoma.
Lishone elango Lwesine sekusabalele izindaba zokudlula emhlabeni kwaBusani “Intshebe” Khuzwayo.
IZingane Zoma yiqembu laseQhudeni eNquthu endaweni yakwaNgqulu.
Imithombo esondelene nalesi simo ibike ukuthi ubephethwe umlenze unesilonda esingapholi.
Kuthe ngokuhamba kwesikhathi wahlaselwa yisifo sohlangothi kwagcina kumenela esibhedlela eDundee namhlanje.
Umculi kaMaskandi uKhuzani ube ngomunye obhodle emswaneni ngokuhamba kwaNtshebe.
“Kwaze kwanzima esikuzwayo ukuthi ubaba uNtshebe akasekho emhlabeni. Sengathi umndeni wakhe ungaduduzeka kulobu bunzima,”
“Kuyona yonke indima kaMaskandi asilaleni ngenxeba, izihlobo nabangani ngithi duduzekani nonke niqine kulesikhathi esinzima,” kududuza uKhuzani.
Kuzokhumbuleka ukuthi emasontweni amabili edlule kuvukwe ngezindaba zokudlula emhlabeni kwaDumisile Manana-Mthalane.
Ubengomunye wabasunguli beqembu likaMaskandi Imithente.
Yena wadlula emhlabeni esesibhedlela eVosloorus, eGoli.
UNdunankulu wakwaZulu-Natal uThamsanqa Ntuli waphefumula ngokushona kwaManana-Mthalane.
“Sibuhlungu ngokuhamba emhlabeni kwaDumisile Manana-Mthalane. Ubengeve ephiwe kuphela ekubeni umculi kodwa ubengumholi ogqugquzela uxolo nobumbano,”
“Ngendlela abezinikele ngayo ubecula kokunye engaholi,”
“Uhambe ibanga elide noMntwana kuthuthukiswa izimpilo zabantu KwaZulu-Natal naseSouth Africa ngobubanzi bayo,” kusho uNtuli.
UNdunankulu ukhumbule ngezikhathi esasebenza njengeMeya eKing Cetshwayo District Municipality lapho wayeswbenzela eduze noManana-Mthalane neqembu.
