
Liphendula amakhanda emgaqweni unyanyavu lweHyundai i20 N Line
Sihle Mkhize
IHyundai Automotive South Africa isizakhele igama nogazi embonini yezimoto kule minyaka edlule.
Enye yezimoto le nkampani ezishaya isifuba ngayo i-i20.
Ngonyaka ophelile le ntandokazi yemoto ibe ngeyesibili ukudayisa kahle ilandela iGrand i10.
Akuthusanga ukuthi le nkampani iphinde yethule olunye ubhememe lwale moto ukuqinisekisa ukuthi iyalala ezinhliziyweni zabathengi.
Ushintsho olukhulu ku-i20 lugqame kakhulu ngaphandle njengoba ingaphambili layo balenze lagoloza kunakuqala.
Kwihlandla lokwethulwa kwayo kwaZulu-Natal esiphithiphini saseBallito kuvele nethuba lokuvivinya iN Line.
Okugqamile kuyo ngaphandle amalambu eLED daytime running, amasondo angu-16 inch nerimu.
Izinqawe ezimbili ngemuva zigcwalisela ukuba yiSporty.
Zihlukene izinhlabo ze-i20 kukhona enenjini engu 1.2 litre ne-1.4 Premium ephuma namasondo angu-15 inch nerimu lesteel elinye ligqize ngombala omnyama.
Lapha uthola i-airconditioner eyimanual, amasensors angemuva, amalambu azikhanyelayo uma ushaya ukhiye, amawindi asebenza ngogesi.
Isafety kit ihlanganisa ama-airbags angaphambili namabhuleki ane-ABS.
Injini ithathelwe kweyangaphambilini ingu 1.2 litre isebenzisa uphethroli ikhiqiza amandla angu 61kW netoque engu 115Nm idonsa ngo gearbox ongu-5 speed oshintshwayo.
Injini engu 1.4 idonsa ngamagiya ayisithupha azishintshayo ikhiqiza amandla angu 73kW itorque engu 133Nm.
Uma ungena ngaphakathi kuN-Line uhlala kuyazwakala ukuthi usezihlalweni zemoto yejubane ngendlela ezikugomothela ngayo.
Zibe sezigqiza ngestich esibomvu, bese zizishaya sasikhumba.
Isiteringi sakhona siqukethe konke sase sigqiza ngesikhumba kuze kuyoshaya phansi egiyeni.
Phakathi nendawo iphuma nescreen ezingu-8 inch sihambisana ne-apple CarPlay be-Android Auto.
Iselula uyakwazi ukuyishaja ngaphandle kokuxhuma ikhebuli njengoba iphuma newireless smartphone charching, i-automatic climate control. Kuqhuma izindlebe umsindo womsakazo njengoba iphuma neradio ibose.
Phansi amaphedali ayi-aluminium bese kube nensada yezindawo zokubeka izinto njengesikhwama esincane semali neselula.
Kwezokuphepha isezingeni njengoba iphuma nama airbag ayisithupha.
Emgwaqeni emazombezombe yaseSinembe uma ubheke kwaDukuza iyabambelela, nezihlalo ziyakulekelela ukukubamba emajikeni.
Akulula ukuyehlukanisa nezimbangi zayo okuyi-Opel Corsa, Suzuki Swift Sport, Peugeot 208.
i20 1.0 N Line DCT
Intengo: R467 500
Injini : 1.0-litre, 3-cylinder, turbo petrol
Ugearbox: 7-speed dual-clutch
Amandla: 90 kW @ 6 000 r/min, 172 N.m @ 1 500-4 000 r/min
Ijubane eliphezulu: 187 km/h
Ukonga: 6.9 L/100 km
Intengo ye-i20 ihambisana neservice plan yeminyaka emine okanya ibanga lika-60 000 km, noma iwarranty yeminyaka emihlanu okanye ibanga lika-150 000 km, noma iminyaka eyisikhombisa ngebanga lika-200 000 km.
INTENGO
1.2 Premium MT – R309 900
1.2 Executive MT – R329 900
1.4 Premium AT
– R329 900
1.4 Executive AT – R349 900
1.0T N Line DCT – R467 500