Kumnyama kwiPirates ehlawuliswe yiCaf kwamiswa abadlali

I-ORLANDO Pirates isihlawuliswe imali engaphezu kwesigidi yinhlangano eyengamele ibhola e-Afrika, kwamiswa nabadlali ababili abamqoka.

Lokhu kulandela izigemegeme ezenzeke e-Orlando Stadium ngesonto eledlule emdlalweni we-Orlando Pirates neMC Alger.

Kwasuka izidubedube ngemuva kwalo mdlalo weCaf Champions League, kungqubuzana izikhulu zala maqembu nabadlali.

Iqhubu liphume ngoNkosinathi Sibisi noSipho Chaine kwi-Orlando Pirates njengoba bemiswe umdlalo owodwa ngenxa yokubandakanyeka kwabo kulolu dweshu.

Nokho izigwebo zabo bobabili zilengisiwe, babekelwa umbandela wokungatholakali necala elifanayo esikhathi esingangonyaka.

Ukube lezi zigwebo zabo azilengiswanga, bekuzoyigqilaza kakhulu iPirates njengoba izobhekana nePyramids FC yase-Egypt ngoMgqibelo.

Lama qembu azogadulisana eFNB Stadium emdlalweni owandulela owamanqamu weChampions League.

Ngaphezu kwalezi zigwebo zabadlali, i-Orlando Pirates iphinde yahlawuliswa isamba sika-R1.3 million.

Omunye wePirates okuphunywe naye iqhubu yisikhulu seqembu, u-Ezekiel Matebula yena ogixabezwe isigwebo sokumiswa imidlalo emine.

Kodwa emibili kule midlalo ilengisiwe ngombandela wokuthi engatholakali enecala elifanayo esikhathini esingunyaka.

Icala elibalahlile elokuhluleka ukuhlela kahle ezokuphepha kulo mdlalo njengoba abalandeli bachusha bangena enkundleni ngemuva komdlalo.

I-MC Alger yona ihlawuliswe isamba sika-R2.9 million ngokubandakanyeka kwayo kulolu thuthuva.

Lisenethini