Ibixhuga imabokoboko imenenja ecaleni lokubula ngesihluku

BEKUKHONA noNdunankulu wakwaZulu-Natal uThami Ntuli enkantolo yeMantshi eThekwini ebigcwele phama njengoba kuvela ummangalelwa uMfanafuthi Kunene.

UKunene oneminyaka engu-37 ubudala usolwa ngecala lokuklinya, abulale owayesebenza ngaphansi kwakhe, maqede wamgqiba egcekeni lakhe eMaotana, eNanda ngoKhisimusi.

Umufi, uNksz Ayabonga Mjilo, obeqashe eQuarry Heights, ngase-Avoca, kodwa engowokudabuka eHlokozi, wagcina ukubonwa ephila ngoDisemba 24.

Kuvela ukuthi wayesendaweni yokudlela eseMhlanga, iCappello, nokuvela ukuthi wabonakala ephuma maqede umsolwa wamlandela, bangena emotweni eyodwa.

Uphenyo lwamaphoyisa lugcine lusivundulula egcekeni likamsolwa isidumbu sakhe ngoJanuwari 4.
UKunene ubebonakala exhuuga kanti nobuso budumbile.

Ubegqoke ijakhethi yase-call centre yaseMhlanga, ibhulukwe elisamlotha namateku anokumhlophe nokumnyama.

IPurpose ibikile ngalolu daba ngomhla ka-4 Januwari.

Kwenzeka lesi sigameko nje kusabatshazwa indaba kaNontobeko obulawe ngokunqunywa uqhoqhoqho eMzinto, ogwini oluseNingizimu nesifundazwe sakwaZulu-Natal mphakathi noDisemba.

Umufi akazange kuphela aziqophe ezivumela ukuthi uyena obulale intombi yakhe kodwa waphinde wafaka nesithombe sesidumbu sentombi yakhe.

Isolezwe