Izinkani zababili phakathi kombuso noGetsemane
Sihle Mkhize
Akwaziwa ukuthi iyozala nkomoni phakathi kwabammeli basomabhizinisi uMnuz Thomas Getsemane ophinde abe ngusihlalo weNanda Taxi Association nombuso.
IWalter Sonamzi Attorneys Inc ithi kuqubuka imibuzo njengoba ikilayenti labo lihujwa ngezincwadi zokuboshwa.
Umbuzo omkhulu ngowokuthi kungani sekuvuka usawoti ogqokweni ekubeni icala ayenenjwa ngalo lingangenanga ngisho enkantolo.
Kuzokhumbuleka ukuthi uGetsemane wavulelwa icala ngomhla ka-3 November 2023 wagqunywa esitokisini izinsuku cishe ezintathu.
Waboshwa nabanye abasolwa eNanda, eQala Quarry.
Kuthe uma icala sekumele lingene enkantolo ngomhla ka-6 ngayo leyo nyanga umbuso wanquma ukulikhipha ohlwini lwamacala azothethwa.
Ngaleyo ndlela uGetsemane wakhishwa kanjalo ke endlini emnyama.
Phezu kwakho konke osekwenzile amaphoyisa aphinde athola incwadi yokumvalela ngoJuly 2006.
UGetsemane uthi yena akaze awubalekele umthetho.
Uthi kunento emsolisayo ukuthi kunezimbangi zakhe kumabhizinisi ezisebenzisana neziphathimandla kwezomthetho.
Kuzokhumbuleka ukuthi selike lavela igama lika Getsemane kwiMadlanga Commission.
UGetsemane ukholwa wukuthi leli qhinga lokumvalela inhloso yalo ukumnqabela ibheyili liphinde limqhelise kwezamabhizinisi wakhe.
Abammeli bathi uGetsemane akaze nangalinye ilanga abalekele umthetho.
Uma umbuso ukholwa wukuthi unecala eliqinile okumele abhekane nalo ukulungele ukuvela enkantolo ukuyozilwela.
Muva nje uGetsemane usanda kuyifakela inselelo eDurban High Court, eyeJ50 okuyincwadi egunyaza ukuvalelwa kwakhe, nokho inkantolo yayimisa okwesikhashana.
IThe Purpose iphinde yahosha umoya wokuthi kunecala elisenkantolo lapho amaphoyisa esolwa ngokuntshontsha isamba semali engango-R150 000 emzini kaGetsemane ngesikhathi eyomvalela.
Marketing and advertising Call or WhatsApp 073 062 1169
