Ushintshe umzila uMaMkhize okhonjwa ebholeni laseSwatini
Usomabhizinisi waseNingizimu Afrika uShawn “MaMkhize” Mkhize uzokwethulwa njengomengameli omusha weMbabane Highanders yaseSwatini maduze.
UMaMkhize usayine isivumelwano sokuphatha le kilabhu ngoLwesithathu, ngokubika kwe-Eswatini Daily News.
Loku kwenzeke emhlanganweni oyimfihlo nobuholi beMbabane Highlanders eSummerfield Botanical Gardens.
Kwithimba ebeliphelezela uMaMkhize kulo mhlangano bekukhona noMbhishobhi Mpendulo Nkhambule.
UMbhishobhi wayeshade nowayengumsakazi woKhozi FM uZanele Mbokazi ongasekho.
Lesi sinyathelo senza uMaMkhize abe ngumengameli wokuqala wesifazane emlandweni wale kilabhu.
Nokho kwabesifazane ukuphatha ibhola Eswatini ulandela ezinyathelweni zikaBusi Dlamini ongasekho, owake wahola iRed Lions FC.
Umthombo obukulo mhlangano uthe isivumelwano sesiphothuliwe, sekusele sethulwe emphakathini.
“Isivumelwano sesiphothuliwe. Okusele manje wukwethulwa kwakhe ngokusemthethweni,” kusho umthombo.
“Umhlangano noMaMkhize uhambe kahle – usengumengameli omusha wekilabhu.”
Kwenzeka lezi zinguquko ebuhonili nje i-Mbabane Highlanders isanda kuhlukana nomqeqeshi uMeck Mwase osejoyine iMoneni Pirates.
Okuthatha amehlo ke wukuthi uMaMkhize uke wamataniswa nokuthatha izintambo kwiPirates.
Uze wahambela umdlalo wayo wamanqamu weSMVAF Ingwenyama Cup la ibibhekene khona neRoyal Leopard ngasekuqaleni kwalo nyaka.
Ukungena kwakhe ebholeni laseSwatini kuza ngemuva kwezinyanga ezimbalwa elahlekelwe yiRoyal AM esuliwe ezigabeni zePSL eNingizimu Afrika.
UMaMkhize ungowesibili waseNingizimu Afrika ukuhola iHighlanders njengoba yake yaphathwa Inkosi u-Ally Kgomongwe wesizwe saseTshwane.
Ukwethulwa ngokusemthethweni kukaMaMkhize kulindeleke maduze.
Ngokwerekhodi lakhe, ukuziphatha kwakhe, nekhono lebhizinisi, abalandeli beHighlanders
bengalindela isahluko esisha.
Lisenethini.co.za
NB: Marketing & Advertising WhatsApp/Call-073 062 1169
