URethabile Khumalo usola umona esinda kushevu obumjuqa
Kwande kaZikiza
KUSOLWA umona kuzakwabo osemculweni ngokugula isigubhukane komculi uRethabile Khumalo osanda kuphuma esibhedlela.
Lokhu kudalulwe unina walesi sihlabani uWinnie naye ongumculi ngesikhathi ekhuluma ohlelweni i-1223 kuKhozi FM izolo ngoLwesihlanu.
URethabile, ozwakele ukuthi useluleme ngenxa yokukhuluma ngokuphapha abuye adedele nohleko, uzwakalise ukuthi weneme njengoba usephumile esibhedlela.
Izindaba zokugula kwakhe zathusa abaningi njengoba kwabonakala nezithombe zakhe ebukeka esezinhlungwini esibhedlela.
UWinnie uveze ukuthi indodakazi yakhe yadliswa ushevu ngumngani naye osendimeni yokucula. Akalishongo igama lomngani.
“URetha wayemenywe omunye umngani wakhe ephathini. Lo mngani wakhombisa ukumdinelwa ngesikhathi ingane yami itheleka nomngani wami ekubeni bona babelindele ukuthi afike yedwa. Okwaxakayo ukuthi lo mngani wakhetha ukunika uRetha isiphuzo kwathi uma embuza ukuthi kungani bengamtheleli umngani wakhe afike naye, bankwankwaza kodwa bagcine sebemthelelile naye. Ngemuva kwalokho zivele zakhala, bajuqwa isisu into engapheli ingakho wagcina esephuthunyiswa esibhedlela,” kusho uWinnie.
Echaza ngalo mngani amsolayo uthe umuntu amazi eminyakeni edlule njengoba ethi wamnxenxa ukuthi amkhulise endimeni yomculo.
URethabile uthe: “Sengisindile ngiwumqemane futhi sengikulungele ukuthi ngibangene,” usho kanje.
Abakwa Khumalo babonge imithandazo yabantu abashaye iziguqo kwazise lo mculi osemncane wayesebangwa nezibi esibhedlela.
URethabile ucishe washona washiya umfana wakhe osemncane uCulo asanda kumbeletha.
Lo mculi oneminyaka engu-26 uqale ukuduma ngesikhathi ekhipha i-single esihloko Umlilo no-DJ Zinhle ngo 2020.
Ukuduma kwale ngoma kwenza yafika ezingeni le-platinum yabukwa abantu abangaphezulu kuka-9 million ku-youtube. Ubuye ngeshodi futhi esededela enye i-single esihloko ‘Ntyilo Ntyilo’ nayo eyafika ezingeni kwi-platinum ngo 2021.
