Uphunyuke emacaleni ocansi nabucayi uJub Jub
Kwande kaZikiza
UPHUNYUKILE emacaleni abucayi umethuli wezinhlelo obuye abe ngumculi uMolemo Maarohanye, odume ngegama likaJub Jub.
Ubebheke necala lokudlwengula, ukuzama ukubulala nokushaya avulelwa ngowayethandana naye u-Amanda Du-Pont.
UJub Jub wake wacashunwa emithonjeni yabezindaba evuma ukuthi ngempela wamnukubeza lomlingisi waze wacela noxolo.
INational Prosecuting Authority iveze ukuthi isiwahoxosile amacala ngoba ibona engekho amathuba okuthi igunyaze ukuboshwa kwalesi sihlabani.
U-Amanda wavula icala esiteshini samaphoyisa eBrixton eGoli ngo Febhuwari 10, 2013.
Wayeqale waneka lezi zinsolo kwi-video ayinameka ezinkundleni zokuxhumana. Lokhu kwaba ngemuva kokuthi uJub Jub wachoma kwipodcast kaMac G ukuthi wamshaya u-Amanda.
Ngemuva kwale video uJub Jub wazinikela emaphoyiseni ngemuva kokuthi amaphoyisa ayeseqalile emfuna uthuli. Wakhishwa ngebheyili ka-R10 000
Ubephuphuma injabulo waze wakhipha isitatimende ebonga abameli bakhe abamkhiphile obishini “Ngithanda ukubonga abameli bami ngendlela abasebenze ngokuzikhandla ekutheni ngitholakala ngimsulwa. Lesi sinqumo singinika intuba yokuphefumula nokuthi kugezeke igama lami ebeselihuduleke phansi,” ubhale kanje.
Lo saziwayo uvamise ukuba sezindabeni ngezigameko ezingezinhle. Ngonyaka odlule waxoshwa ohlelweni lweMoja Love Uyajola 9/9 ngenxa yezinsolo zokuthi wasebenzisa amagama anenhlamba ngesikhathi exabana nowesifazane ayesebenza naye uKeabetswe Mokoena. Kuthiwa wayembiza ngaphansi kweziketi zikanina.
