Uqhilike izihlathi umculi weHip Hop enikwa itiye alincishwa kwiTV
Phila Luthuli
UHLABEKISE isiteshi sethelevishini iNewzroom Afrika 405, umculi weHip Hop uBig Zulu, esamncisha itiye namakhekhe.
Kulokhu ubehambele isiteshi somsakazo iCapricon FM, eLimpopo afike sesimhlinzekele.
“Ngicela ukuthatha leli thuba ngibonge Capricorn FM eLimpopo. Ngithole sebengi bekele amakhekhe ngo 20L netiye, ngiyabonga kakhulu,” ubhale kanje eqhilika izihlathi ezithombeni eliphethe itiye namakhekhe.
Kube injabulo yodwa efika elindwe ngo20L wamakhekhe netiye uBig Zulu emsakazweni 📸:Big Zulu
Kwaba negidigidi ngesonto eledlule ekhala kumethuli wohlelo ukuthi abaphathekile neze kahle ngenxa yokuthi abanakiwe (yena nethimba ayehamba nalo).
“Yazi sisi sifike ekuseni la kodwa asitholanga ngisho itiye. Abasenzelile itiye namakhekhe, kodwa sivuke ekuseni seza la. Ngiyacela ntombi ukuthi ngelinye ilanga uma sifika la kube khona lokhu okuthiwa iCappuccino okudayiswa emagalaji bese kuba ilamakhekhe ayindingiliza ukuze siphile kahle. Hhayi amanzi ekuseni,” washo kanje.
Lo mculi usemkhankasweni njengoba ehambela iziteshi zethelvishini nezomsakazo ukumaketha i-album yakhe esihloko sithi Es’congweni.
Lesi sihlabani seseBergville, kwaZulu-Natal sisanda kukhombisa abalandeli baso ezinkundleni zokuxhumana isipho athi uzithengele sona ngosuku lokuzalwa ngomhla ka-8 Ephreli. Wavela emi phambi kweloli elisha lakwaScania nengqovungqovu yemoto yohlobo lweBMW emhlophe. Wabe esebhala ukuthi: “My birthday present, ngiyabonga kakhulu”. Abalandeli bakhe bambuza ukuthi ukuthenge kokubili yini, wavuma. UZakwe ongumculi weHip Hop okumanje useMelika wamhalalisela wabhala ukuthi: “Ngiyakubongela mfowethu, ukhahlela ngazo zombili manje, konakele,”.
