UNaledi kwi-album enqobe kumaGrammy
Sihle Mkhize
LINDIZELA phezulu iflegi laseNingizimu Africa ikakhulukazi eNanda, eThekwini, ngemuva kokunqoba kwesihlabani somculo weR&B uChris Brown, iGrammy Award.
Lo mculi unqobe ngaphansi komkhakha weBest R&B Album ngecwecwe lakhe elithi 11:11.
Kuyo le album upike uNaledi Aphiwe ongumculi osemncane waseThekwini nosanda kuphothula umatric eKhethokuhle Secondary School.
UChris ubeqokwe emkhakheni emithathu kulo nyaka kodwa ukwaze ukukhala wemuka neyodwa.
UWouter Kellerman oyiciko lakuleli nalo alilalanga phansi lingandlalelwe njengoba ligile izimanga.
Linqobe indondo yesithathu yeGrammy emkhakheni weBest New Age, Ambient, or Chant Album nge-albhamu yakhe iTriveni.
Ngo-2023 wanqoba ngengoma iBayethe, ayenza noZakes Bantwini noNomcebo Zikode.
Isihlabani somculo weRNB, uBeyonce ohlezi ebhekiwe emncintiswaneni yomhlaba uthi ubengalindele ukunqoba indondo yeGrammy. Lo mculi unqobe le ndondo ngaphansi komkhakha weBest Country Album.
Ngalena kokuthi uBeyonce ungumculi oseqokwe kaningi kumaGrammy, ubeqala ukunqoba umkhakha omkhulu kulo mcintiswano.
Ngaphandle kwalezi zihlabani kumaGrammy isizwe samaBhinca besimelwe uKhuzani Mpungose okuvele ukuthi ubeyisimenywa ‘esiqavile’.
Lo mcimbi ka-67 owubukhazikhazi ububanjelwe eLos Angeles, e-US ezintatha ngoMsombuluko.
