Umunyu kushona umlingisi engozini enyantisayo
Bahle Mkhize
ANGENA engenile amazwi enduduzo ezinkundleni zokuxhumana kulandela ukushona kwa Mpho Sebeng (30). Kubikwa ukuthi ushone engozini yemoto eyenzeke eKleksdorp, eNorth West.
UMpho udlale kwiSoul Buddyz, Zibondiwe, Scandal, Ring Of Lies,The Throne, Savage Beauty neminye eminingi.
UNaledi Lebjane ubhonge emswaneni naye ezinkundleni zokuxhumana.
“Izindaba ezimbi ukuthi uMpho akasekho emhlabeni. Ubenekhono ekulingiseni futhi esemncane. Sizwelana nomndeni sithi duduzekani, umphefumulo wakhe ulale ngokuthula,” kubhala uNaledi.
“Impilo ihlezi isikhumbuza ukuthi incikisela kanjani, ikakhulukazi uma kudlula emhlabeni umuntu osemncane. Ngiyohlezi ngiyikhumbula indawo ayidlala kwi The Throne. Ubenekhono umndeni wakhe awududuzeke,” kusho uBoitshoko Moses kwiX.
ULetlhogonolo Motseeng ongumngani kaMpho othi ugcine ukubonana naye izolo kanti sebebonana okokugcina uthi uphelelwa amazwi ngalesi sigameko.
“Lala uphumule mngani wami, ngiphelelwa amazwi, inhliziyo yami iphukile. Mfana izolo sichithe usuku lonke ndawonye kanti ngeke ngisaphinde ngikubone. Ngiyakuthanda mfana, bekungamazwi wami lawo ngesikhathi usuhamba,” usho kanje.
Umndeni ubungakophefumuli ngalo mshophi kwazise usanda kwenzeka.
Kwenzeka lengozi nje abantu abaningi basazikhotha amanxeba kulandela ukushona kwaDr Mbongeni Ngema. NoNgema washona engozini yemoto esuka emngcwabeni e-Eastern Cape ebheke eKZN.
