Umsakazo noju lwabethuli bezinhlelo kwiMetro FM Music Awards 2024
Liyah Singela
ISITESHI somsakazo iMetro FM izobe igadla ngoLuthando “Lootlove” Shosha ebambisene noTebogo “Proverb” Thekisho njengabethuli beMetro FM Music Awards 2024 (MMA24).
Lo mncintiswano obhekwe ngabovu uzobanjelwa ezinkundleni zezemidlalo eMbombela, eMpumalanga ngomhla ka-27 Aphreli.
UProverb ozobe ebambisene noLootlove ekwethuleni iMMA24📸:SABC
ULuthando uthi: “Ngizizwa ngithobekile ukuthi ngibe ngomunye umethuli weMetro FM Music Awards. Kuwukukhula emkhakheni kimi ukwethula okukuqala ngqa lomncintiswano. Ngimagange ukuletha injabulo, amahlaya angeke aphinde alibaleke ngokubambisene noProverb,” usho kanje.
Isiteshi sikhiphe isitatimende sathi uLoot Love uzofika noju okuhlanganisa amava okuba umsakazi nomethuli wezinhlelo kuthelevishini. Sikhuluma nje usanda kubuyela emsakazweni njengoba ebambisene noThabo “Tbo Touch” Molefe ohlelweni lwakhe.
UProverb naye ubonge wanconcoza ngethuba alinikiwe ukwethula lomncintiswano imkhulukazi.
“kuyintokozo ukwethula Lo mncintiswano, indima yomculo kuleli inothile, iyathokozisa ngaleyo ndlela ngiyathobeka,” enqamulela ngamafuphi.
Akuzoba yila bethuli nje kuphela isiteshi esizogadla ngabo kodwa banoLamiez Holworthy noZanele Potelwa owethula uhlelo lwantambama kwi5 FM. Laba bazobe bexoxisana nalabo abazobe behlabene ngezindondo egumbuni elibizwa nge”Green Room”.
Isiqubulo salonyaka sithi “Black To The Future” nalapho kuhloswe ukubhiyozela okutshalwe nokuzuzwe amaciko kule ndima yomculo. Konke kuzobe kukhonjiswa kuSABC 1 ngo-8 ebusuku.
