UDJ ushintshe umqondo ngedolobha okwabulawela kulo uyise wengane yakhe
U-DJ Zinhle usegcine esiqungile isibindi washintsha umqondo ngokuthi avume ukuzonandisa eThekwini.
Kuzokhumbuleka ukuthi lo DJ waseDannhauser enyakatho neKwaZulu-Natal wabhala ezinkundleni zokuxhumana ukuthi angeke awubeke umcondo wakhe kuleli dolobha njengoba kwadutshulwa uKiernan “AKA” Forbes ngoFebruary 10, 2023. U-AKA no-DJ Zinhle banendodakazi.
U-AKA wadutshulwa ezipholele e-Wish On ekuFlorida Road Kanye nomngani wakhe uTebello “Tibz” Motsoane.
Ukubulawa kuka-AKA kwenza wakhansela ukuzonandisa kwiFact Durban Rocks ehlala iba khona njalo ngesikhathi seDurban July 2023.
“Angikho esimweni esikahle sokuthi ngingeza eThekwini. Angilizondi iTheku kepha njengamanje ngisabhekene nobunzima. Ngethemba ukuthi ngokuhamba kwesikhathi ngizoba nawo amandla, ngiwushintshe umqondo,” lo DJ wodumo lwengoma ethi I Am wabhala kanje ku-instagram.
Uzobonakala ePeople’s Park eMoses Mabhida Stadium ngoJuli 6 eshiyelana inkundla no DJ Tira, Zuluboy, Big Zulu, DJ Maphorisa, Major League DJz, Young Stunna, Zee Nxumalo, Oscar Mbo, Mörda; Blxckie, Lamiez, Goldmax, Qwabe Twins, Dladla Mshunqisi, Duncan & Zakwe noRocksilver. Amathikithi aqala kuR200, awe-VIP abiza uR950, aweVVIP abiza uR1,800 bese kuthi aweVVVIP abize uR2,000.
