
Ubulawe e-Adams Mission odune iFortuner eWestville
Bahle Mkhize
AMAPHOYISA akwaZulu-Natal, eThekwini, adubule abulala umsolwa eNingizimu yeTheku e-Adams Mission ngoLwesihlanu kusihlwa.
Ithimba lamaphoyisa nonogada belilandela umkhondo wemoto yohlobo lweToyota Fortuner edunwe eWestville.
Ngesikhathi amaphoyisa eyivimbezela e-Adams abasolwa ababili bavulele ngenhlamvu bebhekise kwabasidlodlo bezama ukuvula indlela yokubaleka.
Nokho amaphoyisa akwazile ukunemba oyedwa wasala enkundleni kwathi omunye wabaleka washiya isithunzi wangena ehlathini.
Kutholakale isibhamu esisodwa somsolwa endaweni yesigameko, kanti kumanje omunye umsolwa obalekile uzingelwa njengenyamazane.
Lolu phenyo beliholwa iKwaMakhutha SAPS Trio Detectives, Amanzimtoti SAPS Crime Prevention, Isipingo SAPS Trio Crimes, Umlazi SAPS Trio Detectives, Metro Police K9 Unit, Fidelity SIU, ET Rapid Response TRT, and Tracker Connect.
Khonamanjalo izolo ebusuku basale enkundleni abasolwa ababili abangongqondongqondo ekudunweni kwezimoto ezithwala imali.
Lesi sigameko senzeke eNew Glasgow, eVerulam enyakatho nesifundazwe saKwaZulu-Natal.
Amaphoyisa asekhiphe isitatimende ngezibalo zezibhamu nezinhlamvu ezitholakele ngoSeptemba.
Kutholakale izibhamu ezincane zokuzakhela ezingu-329 kanye nemijojantaba engu-23. Kuphinde kwavundululwa nezinhlamvu ezibalelwa 5046.
Lo msebenzi uholele ekutheni kuboshwe abasolwa abangu-10 627 ngamacala ahlukene esifundazweni sakwaZulu-Natal.