Oshiye kwiGagasi FM usezozwakala kwi-East Coast Radio
USEZOZWAKALA njalo uThandi ‘Zisto’ Mhlongo kwi-East Coast Radio njalo ngoMgqibelo nangeSonto kusukela ngo-6 ekuseni kuya ngo-10.
Ephawula uTravis Bussiahn ongumphathi wezinhlelo kwi-East Cost Radio uthe: “Sijabule ukwamukela uZisto emndenini we-East Coast Radio. Ithalente elivutshelwe ekhaya, silangazelele ukumuzwa nabalaleli bethu abathandekayo ekuseni ngezimpelasonto”
Kuzokhumbuleka ukuthi uZisto akayivuselelanga inkontileka kwiGagasi FM nakuba wayesechithe khona iminyaka ewu-8 esebenza khona.
UZisto ujoyine iGagasi ngo-2017 ethula uhlelo lwasekuseni ngaphambi kobuya aye kolwasemini. Kusukela ngo-2022 ube esekhushulelwa ohlelweni lwantambama. Kwenzeka lokhu nje ubesehlale kulo msakazo iminyaka emithathu.
Kulesi siteshi uqoke ukungayivuseleli inkontileka nakuba ubesathandwa ngabalaleli nabaphathi.
Le ntokazi beyethula uhlelo iThe Gagasi Fast Lane ngokubambisana noDJ Sphechacular noDJ Naves ababuye kulesi siteshi ngo-2024 bekade besakaza kwiMetro FM.
UZisto eshiya kwiGagasi esitatimendeni wabonga ithuba elingandele bani alinikwa yilo msakazo osuzinze eCornubia. Waphinde wabonga nothando abalaleli beGagasi abamnike lona kule minyaka ekulo msakazo. Noma kunjalo akasidalulanga isizathu sokushiya kwakhe.
