Onogada badubule babulala ababili eNewlands

Philasande Luthuli

ONOGADA benkampani iMarshall badubule babulala abasolwa ababili eNewlands West, eThekwini, ngoLwesibili emini.

AbeMarshall Security’s Special Operations bahlonze imoto ebihamba abesilisa abane nabebesolakala esigamekweni sokungena emzini womuntu beshaqe impahla ngo’dli’ behlomile.

Ngokusho konogada labasolwa badedele imbumbulu yezinhlamvu bezama ukuchaba indlela kanti bafike zigawulwe zabekwa.

Baphindiselile nabo kwasala enkundleni abasolwa ababili.

Kube sekuboshwa abanye abasolwa abathathu abebemdibi munye nalabo ababulewe.

Khonamanjalo esigamekweni esingahlobene nesingenhla amaphoyisa adubule abulala abasolwa ababili eMpangeni, kwaZulu-Natal ngoMsombuluko.

Ngokombiko wamaPhoyisa abenza umsebenzi wawo wenjwayelo ngesikhathi eqaphela imoto emhlophe eyiveni.

Le moto ibipake onqenqemeni lwezimoba ku-Old Road kuyo lendawo.

Ngesikhathi amaphoyisa esafuna ukuxoxa nabo bavulele ngenhlamvu bebhekise ngakuwo kwaba ukusuka kothuli lweZichwe.

Emuva kwemizuzu igagazisana ngenganono abasolwa basale enkundleni begugile izinhlamvu emzimbeni.

Amaphoyisa azithathile kwalezo zibhamu abedutshulwa ngazo kwatholwa nezinhlamvu.

Kuvele ukuthi laba ababili bekunezincwadi ezikhishwe inkantolo ezigunyaza ukuboshwa kwabo.

Kwale moto ababulewe behamba ngayo bekubikwe ukuthi intshontshiwe kwaMsane ngoLwesihlanu olwedlule.