Kuzochitheka izishebo kubuya isilomo seGenerations:The Legacy

IKHUZA ibuya kwiGeneratons:The Legacy inkakha yomlingisi uRapulana Seiphemo.

Lokhu kuvele kwi-teaser kaJulayi ukuthi lo mlingisi uzobuya aqhubeke adlale indawo kaTau Mogale.

Ngokwezinhlelo zababhali balo mdlalo okhonjiswa ku-SABC 1 ngo-8 ebusuku ngoMsombuluko kuya kuLwesihlanu, uSeiphemo uzobuyelana nomama wengane u-Ayanda olingiswa uSamelo Tyelbooi.

Ngokwe-teaser kubhalwe ukuthi “U-Ayanda uyathuka uma ebona umuntu mumbe emnyango wakhe.” Iqhuba ibhale ithi “Lezi zithandani zivuselela uthando lwabo.”

USeiphemo ugcine ukubonakala kulo mdlalo ngo Aphreli wonyaka odlule lapho wayehambele umngcwabo kaMazwi Moroka, okuyindawo ebidlalwa uMusa Ngema.

USeiphemo wabuyiswa kanye nenye inkakha yomlingisi uConnie Ferguson, odlala indawo kaKarabo.

Abadidiyeli beGenerations: The Legacy kuthiwa bakwenza ngesimabomu ukubuyisa Kanye Kanye laba balingisi ngoba befuna kukhule izibalo zababukeli.

Ngokomdlalo uSeiphemo wayephuma ejele lapho wayeboshelwe khona icala elenziwa umama wengane u-Ayanda.

Uphume kulo mdlalo ngesikhathi u-Ayanda eseqome uNkosiyabo Cele, odlalwa uMuzi Mthabela.

UMthabela usanda kushiya lo mdlalo wathola indawo enkulu kwiMy Brother’s Keeper lapho elingisa indawo yomfowabo kaMshengu, olingiswa uLindani Nkosi.