Kushone 12 kwalimala 45 engozini yebhasi
SIFINYELELE kwabangu-12 isibalo sabantu abashonele emgaqweni-R21 eduze ne-Kempton Park ngoLwesibili ekuseni kwathi abangu-45 balimala.
Labantu bebegibele ibhasi bevela emsebenzini bebheke e-Katlehong.
Abezimo eziphuthumayo bathole abesilisa abayisishiyagalolunye nabesifazane abathathu sebeshonile endaweni yesigameko, kanti abaphenyi basacubungula imbangela yale ngozi.
Okhulumela abase Ekurhuleni Emergency Services, uWilliam Tladi, uthe ibhasi ligingqike izikhathi eziningana ngaphambi kokuthi lime ngohlangothi. Abashonile kube abesilisa abayisishiyagalolunye nabesifazane abathathu.
“Lo mgwaqo ungaphansi kwa-Sanral. Sithembele kumakhamera afakiwe kuwo umgwaqo ukusiza abaphenyi ukuze bathole imbangela yale ngozi,” kusho u-Tladi.
Amaphoyisa avale umzila osenyakatho womgwaqo u-R21 ngesikhathi kuqhubeka uphenyo.
Amaphoyisa wase-Gauteng athumele indiza enophephela emhlani ukuyosiza endaweni yesigameko. Abaphenyi bafike endaweni yesigameko, izidumbu sezivele zimbozwe ngamashidi amhlophe emgwaqeni.
NgokweScrolla.Africa u-Andile Mngwevu, oyilungu lesigungu esikhulu ekomidini leMeya elibheke ezeziMali nezokuThutha, uthe ulithole ucingo mayelana nale ngozi.
“Kuyadabukisa okwenzeke namhlanje. Asazi ukuthi kube kwenzekeni ngoba uphenyo lusaqhubeka,” kusho u-Mngwevu. Ubuye waveza ukuthi wonke amabhasi omphakathi asesimeni esihle sokuba semgwaqeni.
Izimoto ezine zomakhelwane bezifikile endaweni yesigameko cishe ngo-11 ekuseni. Izikhulu kanye nabezindaba bebekhombisa ukushaqeka ngalokho abakubonile.
Amaphoyisa amaningi, okuhlanganisa i-Johannesburg Accident Unit, athunyelwe ukuyophenya ngalesis igameko esibuhlungu.
