ITheku liqashe amaphoyisa angaphezu kwa-500
Bahle Mkhize
IDOLOBHA laseThekwini lamukele amaphoyisa amasha sha kulo mkhandlu angaphezulu kwa-500.
La maphoyisa azoqinisekisa ukuthi izivakashi kuleli dolobha ziphephile kulama holidi kaKhisimusi.
IMeya yeTheku uCyril Xaba ekhuluma emcimbini wokuphothula ngoMsombuluko unxuse amaphoyisa amasha ukuthi agcine isithunzi salo msebenzi.
“Samukela wonke amaphoyisa amasha, ukujutshwa kwawo kuqinisekisa ukuzibophezela ekuphepheni kwabantu edolobheni. Nihlezi nilimele iqiniso nemithetho yedolobha okumele ilandelwe,” kusho uXaba.
Uphinde waqhubeka wanxusa amanye amaphoyisa ukuthi bahlale ngesinqe esisodwa bafake umfutho ekuqhubekeni nokulwa nobugebengu.
Inhloko yamaphoyisa kuleli dolobha uSibonelo Mchunu uthe kusaseyisiqalo nje lesi emizamweni yokwengeza isibalo samaphoyisa ukuze balwisane nobugebengu.
Ukutshalwa kwalamaphoyisa kuza emuva kokumenyezelwa kwezimoto ezingaphezulu kwa-150 ezizosiza ukwenza umsebenzi ube lula.
“Ukuqashwa kwamaphoyisa amasha kukhombisa ngokusobala ukuthi leli dolobha lizibophezele kangananani ukufezekisa iphupho lalo lango 2030. Amaphoyisa kaMaspala ayazigqaja ukuba yingxenye yalo mshikashika.
“Sibongela namaphoyisa amasha sibafisela okuhle kodwa ohambweni lwabo,” kuphetha uMchunu.
