Inyelwe inyoni esandleni iNyosi yeSilo samaZulu
Liyah Mseleku
UMASPALA weseZuland usukuzwile ukubhonga kweNgonyama yamaZulu uMisizulu kaZwelithini kulandela ukuxoshwa kweNyosi yaso uMnuz Buzetsheni Mdletshe. Sekuputshuke incwadi ivela kwiNkatha Freedom Party (IFP) imqashela umsebenzi omusha.
“Kuyintokozo ukukwawazisa ngenkontileka yakho ukuba iSenior Art & Culture Coordinator eNdonsa Art & Craft Centre. Ukuqala kwakho ukusebenza kuzoba uMeyi 2. Sicela usazise uma usuyitholile lencwadi, siyakubongela,” kubhalwe kanje encwadini eputshuke kwabezindaba ngaphambi kokuthi bakhiphe isitatimende kwabezindaba.
UMdletshe uzobe ecija izimbongi namaciko asafufusa ngaphansi kwalesi sikhungo samaCiko.
ISilo sisanda kuzwakalisa ukukhathazeka ngobuholi be-ANC kwaZulu-Natal sithi benza sengathi akekho. Sasisho kanje emuva kokuxoshwa kwaMdletshe njengoba eholelwa ihhovisi likaNdunankulu eholwa i-ANC.
“UMnuz Mdletshe useqhulwini ezintweni eziningi okuhlanganisa nemicimbi eyenzekayo eNdlunkulu. Phakathi kweminye imisebenzi kubalwa ukuthelwa kwamanzi okwenziwa uma iSilo esisha sihlala esihlalweni. Umkhosi wokweshwama neminye eminingi. ISilo sidumele ngendlela uhulumeni wakwaZulu-Natal enza ngakhona izinto,” kwakubhalwe kanje encwadini evela ehhovisi leSilo.
I-ANC yakhipha isitatimende yabeka izaba ukuthi kushoda imali nokuthi iNyosi isikhule kakhulu.
Ngokwencwadi evela kuhulumeni ehhovisi likaNdunankulu eyasabalala ngoMsombuluko, inkontileka kaMdletshe izonqanyulwa ngo-Ephreli 30, isizathu kuthiwa ukushoda kwenkece. Empeleni lenkontileka bekufanele iphele ngonyaka ozayo.
Abaningi basola ukuthi uMdletshe wazakhewa isigcwagcwa ngesikhathi sezidubedube kwaCeza uSihlalo we-ANC kwaZulu-Natal, Mnuz Siboniso Duma, owayephethe uhlelo ephuca uNdunankulu kaZulu uMnuz Thulasizwe Buthelezi umbhobho esakhuluma. UMdletshe wenqaba ukusukumisa iSilo njengoba athi kunemigudu elandelwayo. NoDuma wathi uhulumeni unamandla.
