Ingebhe kuduka “obeyophothula” emdansweni kwaMashu
UMNDENI wakwaKhambule e-Adams Mission, ogwini oluseningizimu yeTheku, ucela ukufuniswa indodakazi yawo u-Amile Khambule.
Ngokusho kukagogo wale ntombazane eneminyaka engu-19 yahamba ekhaya ngoMgqibelo ithi iya enkwarini endaweni thizeni KwaMashu.
Ugogo uthi ngesikhathi esezama ukuyithinta ngocingo ngakusasa ngeSonto ucingo lwabanjwa owesilisa owathi ucingo umgcinele lona.
Kuthiwa lo mlisa waphika ukuthi uyazi ukuthi ukephi u-Amile.
Le ntombazanyana iduka nje KwaMashu esigcemeni sakwa-L bekunendumezulu enkulu yenkwari ekuthiwa ithathe izinsuku ezintathu.
Izithombe nama video abantu bakhona bezijuxuza zisabalelele ezinkundleni zokuxhumana.
Okhulumela amaphoyisa KwaZulu-Natal uColonel Robert Netshiunda uthe.
“Amaphoyisa aseMbumbulu asevule icala lokulahleka kwentombazane eneminyaka engu-19 ekukholakala ukuthi yaduka ngoMgqibelo. Lowo ongaba nolwazi nokuthi ikuphi unxuswa ashayele amaphoyisa aseMbumbulu kunombolo ethi 079 500 1031 noma ashayele u Crime Stop ku 08600 10111.”
