Iminjunju eshaywa nges’thende uNyonemhlophe kuGu Maskandi Festival
Liyah Mseleku
Umculi kaMaskandi uNyonemhlophe Jali odabuka ogwini oluseningizimu nesifundazwe saKwaZulu-Natal, kwaThathani, eHighflats, ukhihla esikaNandi ngokungaqashwa ngakubo.
UNyonemhlophe ukhala nje kunendumezulu yomcimbi ohleliwe ngomhla ka-27 kule nyanga Ugu Maskandi Festival.
Le nsizwa eyaziwayo ngekhono layo lokudlala inkositini nesiginci ithi iphumela obala ngoba igeza igama layo kulabo abanemibuzo ngokungaqashwa.
“Ngicela ukuqinisekisa ukuthi uNyonemhlophe neqembu lakhe uzobe engekho ku-UGU Maskandi Festival”
“Kulokhu isizathuke kwayena uNyonemhlophe Jali akasazi ngoba kuze kwaba ukube iyaphuma iposter ubengakaze athintwe noma afonelwe”
“Ngibafisela inhlanhla bonke ozakwethu abazobe beyonandisa kulo mcimbi sengathi konke kungaba impumelelo” usho kanje.
“Kubuhlungu ngoba imcimbi mayisafika siyatshelwa ukuthi asamukele esikwamukelayo kuthiwe isazokhula mese sithola okungcono”
“Uma ngabe isikhulile asisabizwa sekubizwa abanye okungenzeka ukuthi sewumkhulu ngaphezu kwakhe uNyonemhlophe futhi lokho ngiyakwamukela,” kuzikhalela lo mculi osanda kukhipha i-album esihloko sithi Impindamshaye.
“I-album ineviki iphumile yenza kahle kakhulu ishloko Impindamshaye inezingoma ezingu-14.”
“Abathandi bomculo bacheme udede nayo yikho kuvungazela ezinkundleni zokxhumana ngokungabonakali kwami kulo mcimbi,” kuphawula uNyonemhlophe kwiPurpose.
Uphethe ngokuthi akatheli nhlabathi ephalishini lamuntu ugeza igama ngoba kubukeka sengathi ebantwini uyena onqabile.
