Bahambe bengawuvali umlomo osaziwayo eNanda
Linda Ximba
BAGODUKE bengawuvali umlomo ngeNanda edume kabi kulezi zinsuku abalingisi abamnkantshubomvu emidlalweni yeshashalazi nethelevishini.
Indawo yaseNanda kuphuzwa ngayo itiye emizini eminigi njengoba idume ngokukhipha izidumbu.
Kubhidlange igenge encane ehlukumeza imizi ikakhulukazi eBhambayi naseMawoti.
UBongani Mbatha, oseke wadlala kuZalo noBhekani Shabalala olingise kuSbongile & The Dlamini’s bebeyingxenye yohambo lokungcebeleka lwe-INK Tour nabezindaba ngoLwesine.
Kuvakashelwe izindawo ezinomlando eNanda.
Kuqalwe eMahatma Ghandi, eBhambayi, kwadlulwa ekomkhulu lebandla lamaNazaretha eKuphakameni naso Ohlange Institute.
Le ndawo yasungulwa uDkt John Langalibalele Dube, owaba ngumongameli wokuqala we-ANC.
Sebefikile Ohlange banekelwe ngomlando omude nohlabahlosile kaDube kusukela ekusunguleni lesi sikole waze wawelela phesheya e-USA.
Kulesi sikole kwaqopheka umlando njengoba uNelson Mandela wavotela khona ngokhetho lokuqala ngo-1994.
Kuvele ukuthi ngaphambi kokuthi aboshwe eHowick esendleleni ebheke eGoli uMadiba wayekade ebambe umhlangano Ohlange nabanye abaholi.
Kule ndawo yaso Ohlange kungcwatshe khona yena uDube, amakhosikazi akhe amabili nezingane.
UMbatha the ubheme wakholwa ngokufunda ngomlando kaDube, wathi kusemahlombe abo njengamaciko ukufundisa abantu ngokwenza imidlalo ukuze umlando ungacisheki.
“Bengingazi ukuthi iNanda inomlando onothe kanjena. Kusemahlombe ethu njengamaciko ukuthi sidwebe isithombe esiyisona ngalendawo.”
UShabalala uthe lukhulu akufundile ngepolitiki, inkolo nemfundo yabantu abanjengo Dube noDkt Prixley ka Seme, owayengummeli.
Usihlalo we-INK Tourism uMel Ntombela the bakhethe ukumema osaziwayo ukuze babalekelele ekudwebeni isithombe esihle ngeNanda babuye bahakambise ubuhle beNanda namaphethelo
NB: Marketing & Advertising WhatsApp/Call-073 062 1169
