Asethelekile eMelika amaBhunu abalekela ‘ukubulawa’
Bahle Mkhize
Asethelekile eMelika amaBhunu angu-59 nezingane zawo athi abalekela ukubulawa kuleli.
Nokho kukhulu okukhuluma osekudalekile njengoba kusolwa labantu bebala elimhlophe ngokuqamba amanga aluhlaza.
Kuzokhumbuleka ukuthi uMengameli wakuleliya lizwe uDonald Trump usanda kunqaba ukuthi i-US ikhoselise abantu abafuna ukubhaca ngoba bemnyama.
Ebuzwa ngabezindaba uTrump ukuthi kungani ekhetha iphela emasini uthe:
“AmaBhunu ayabulawa, bathathelwa nomhlaba, eNingizimu Africa kwenzeka izinto ezimbi,”
“Angazi njengoba kunomhlangano weG20 kuleliya lizwe kuzoba yinto enjani”
“Ngilindele ukuthi sike sikhulume nezimphathimandla zakhona eMzansi,” kusho uTrump.
ISouth Africa isamile kwelokuthi akubulawa maBhunu la njengoba besho.
UMengameli wakuleli uCyril Ramapbosa ekhuluma kwinkomfa ese-Ivory Coast, uthe:
“Lawo maBhunu ahambe ngoba engafuni ukuhambisana nemigomo ehlose ukulinganisa abakuleli kusukela ngobandlululo,”
“Bekubusa idlanzana njengoba inkululeko ize yatholwa eminyakeni engu-30 edlule. IMelika igeje umgodi kulokhu kodwa sizoqhubeka silokhu sixoxe nabo,” kusho uRamaphosa.
AmaBunu asalile naxoxisane nabezindaba zeReuters eCape Town ngoMsombuluko athe awaboni ukuthi bayothola impilo engcono labo abahambayo.
“Angicabangi ukuthi ukubalekela izinkinga ozaziyo kuyosiza. Sinezwe elihle kabi futhi kuyaphileka,”
“Sibusisekile eSouth Africa nazo zonke izigigaba ezenzeka khona, iyohlezi ingelinye lamazwe ahamba phambili emhlabeni,” kusho uRobert Skeen (47) ophila ngokudayisa amaboerewors rolls.
