Bezibuya abalandeli baPhuzekhemisi bembungaza ekhaya
Sihle Mkhize
Abalandeli besihlabani somculo kaMaskandi, uPhuzekhemisi badele konke bahlangana balibhekisa emzini wale nkakha eLovu ngeSonto.
Ubukhangwa izimoto zikanokusho zigcwele igceke emzini walesi sihlabani ezinye zipake ngaphandle.
Bahlangana nje bathi babone kuyicebo elihle ukuzobungaza ukuhlonishwa ngeziqu zeDoctorate Degree kwaPhuzekhemisi.
UPhuzekhemisi waqala ukuqopha umculo ngo-1988 nge-album esihloko sithi Wemalume kodwa udume ngeMbizo eneminyaka engu-38 yiSt Paul Bible Institute.
“Ngicela uludlulisa ukubonga esizweni sakithi oLovu, Mashiwase, Inkwali, Adams. Lokhu enikwenze kimi ngishaywa amahloni angazi nginganiphani”
“Ngifisa sengathi uNkulunkulu angahambela amakhaya wenu athele nezibusiso. Angiwazi uKhisimusi omngaka,” kubonga uPhuzekhemisi.
UMnuz Magagasi Mthembu oyisakhamuzi saseLovu ubonge umsebenzi kaPhuzekhemisi asewenzele isizwe.
“Mkhulu mfowethu umsebenzi osuwenzile esizweni. Sibonga negalelo nakhu sesibona nabantwana benza ncimishi. Ngempela yinto esegazini koGedeza”
“Siyakubongela nomndeni wakho wonke uqhubeke nokwenza izinto ezinhle emphakathini,” kuphawula uMthembu.
UMnuz Maza Dlamini okunguye owaqhamuka nalo mbono bawamukela bonke ubonge ukubambisana, ukuhloniphana nokuzwana.
Sikhuluma nje umfo kaMajazane uhlele indumezulu yomcimbi Inkambo Annual Journey of Phuzekhemisi ezoqala ePietermaritzburg, ngomhla ka-30 August.
Amathiki atholakala kuzo zonke izitolo zakwa Shoprite, Checkers, online naseComputicket.
NB: Marketing & Advertising WhatsApp/Call-073 062 1169.
