Uvo lweNdlunkulu ngolweSilo esiqoshwe sithuka inhlamba
INDLUNKULU kaZulu isikhiphe isitatimende iveza ukuthi inalo ulwazi ngezinkulumo eziqoshiwe ngokungemvume ezithunaza iSilo.
Ibe isisola itulo lokudicilela phansi igama nesithunzi seNgonyama uMisuzulu kaZwelithini ngezinkulumo ezisatshalaliswe ezinkundleni zokuxhumana.
INgonyama izwakala ihilizisana nodadewabo umntwana uNomkhosi kaZwelithini imthuka imbiza nangaphansi kweziketi zikanina. Kwenzeka lokhu nje isuke izwakala ukuthi yeqiwe izinkamba zikaFaro.
Amanye amagama akabhaleki ngenxa yokuqojama kolimi obelusetshenziswa.
Kulesi sitatimende iNdlunkulu isola umkhankaso wokungcolisa igama leSilo esisesihlalweni njengoba sekusondele izinsuku zokuqulwa kwecala lombango wesihlalo sobukhosi bamaZulu.
“Indlunkulu inalo ulwazi ngama-voice notes. Lolu wudaba luzosentshenzwa wumndeni, kuzokwenziwa uphenyo lwangaphakathi.
“Emuva kokuphothulwa kophenyo kuzothathwa izinyathelo ezifanele. Umndeni waseNdlunkulu ucela ukunikwa ithuba lokubhekana nalolu daba ngenhlonipho ngalesi sikhathi,” kusho isitatimende.
