Umsakazi woKhozi FM ubagile igoda kuBasadi
Bahle Mkhize
UMSAKAZI woKhozi FM uNonhlanhla “Mroza” Buthelezi udle ubhedu emncintiswaneni iBasadi in Music Awards ngaphansi kwe-Entertainment Radio Presenter of the year.
UMroza usakaza uhlelo lwasekuseni iVuka Mzansi Breakfast Show ngokubambisana noSipho “Sgqemeza” Mbatha kusukela ngoMsombuluko kuya kuLwesihlanu.
Wamukele indondo ngoMgqibelo ebusuku eJorburg Theatre, eGoli kwachwaza inhlokomo.
Ungene ezinkundleni zokuxhumana ngeSonto emini wabonga abamesekile ngesikhathi esanxenxa amavoti.
“Mndeni❤️ Omkhuluuu Ngiyabonga Ngokungeseka🌹🌹🌹
Let Me Introduce Myself :
The Entertainment Radio Presenter Of The Year : MROZA BUTHELEZI
#imanafricanwomanbeforeimsoutthafrican🌍🇿🇦,” ubhale kanje.
Kuqondane kahle kuzosa ngeSonto agubhe usuku lokuzalwa.
Ukhozi FM limhalalisele nabalandeli bakhe ezinkundleni zokuxhumana.
“Ukhozi FM lufisela uNonhlanhla ‘Mroza’ Buthelezi usuku oluhle lokuzalwa.
Sithi halala ngokudla umhlanganiso kuma Basadi in Music Awards ngaphansi kwe-Entertainment Radio Presenter of the year! Sibonga asiphezi kuwe mlaleli ngokwenza lokhu kube yimpumelelo, izandla zedlula ikhanda. Halala Limaririri,”
UMroza ubencintisana noLebo Maoela (Lesedi FM), Catherine Mahamo (Opulence Radio), Lethabo Lejoy Mathatho (Thobela FM), Mpumi Mlambo (Metro FM).
UMroza udabuka phesheya komfula uThukela eDokodweni, eGingindlovu.
