UMrepha uthembisa “ukubagwaza” ngomkhonto ubuyela egemini

Kwande kaZikiza

UKHUZA ibuya emculweni uZuluboy obesekuphele iminyaka eyishumi engakhiphi umsebenzi womculo.

Leli ciko laseNtuzuma, eThekwini, elishaya isigqi seHip Hop, lizalwe linguMxolisi Majozi.

Ukhiphe i-single esihloko sithi Mayibuye ayidedele ngosuku olukhulu eNingizimu Afrika njengoba beyivota ngoMayi 29.

Echaza ngokukhipha leli culo uZuluboy uthe: “Leli culo likhuluma ngomzabalazo futhi ngilikhiphe ngesimabomu njengoba izwe libungaza iminyaka engu-30 lathola inkululeko. Ngithi mayibuye iNingizimu Afrika!”

UZuluboy ubesegxile emsebenzini wokulingisa nokuhlela imicimbi.

Abaningi bagcine ukumbona kuthelevishini elingisa indawo kaMcGyver kuDurban Gen eyayidlala ku-etv eminyakeni emibili edlule.

Usebuyela emculweni nje ubematasa ngesikhathi kuphenjwa iqembu lepolitiki elifike kwezwakala, Umkhonto Wesizwe Party (MK).

Yena nabalingisi okubalwa u-Ernest Msibi, Khulu Skenjana nosomahlaya ongumsakazi weGagasi 99.5FM uFelix Hlophe basungule iCreative Council ngaphansi kwe-MK Party.

Lokhu bakwenza ngemuva komhlangano noMnuz Jacob Zuma eBassline, Joburg ekuqaleni kwalo nyaka.

Abakulwela kakhulu indaba yeCopyright Amendment Bill abafuna ibuyekezwe njengoba kunesigatshana abathi siyabacindezela.

Bakholwa wukuthi i-MK Party izokwazi ukulalela izikhalazo zamaciko.

UZuluboy waduma ngesikhathi efika emculweni ngo-2008 ngengoma kaCaiphus Semenya esihloko sithi Nomalanga ayishintsha kancane ngokufaka isigqi seHip Hop.