Ubesanda kushadelwa oLiverpool oshone engozini yemoto
Isihlabani seLiverpool uDiogo Jota ushone eneminyaka engu-28 ubudala ngemuva kokubandakanyeka engozini yomgwaqo.
Kuvela ukuthi iLamborghini abehamba ngayo nomfowabo u-Andre Silva iphaphalazile emgwaqeni enyakatho yeSpain, yaphuma emgwaqeni yagingqika yabe seyisha.
Bekusaphele amasonto amabili nje kuphela uJota eshade nesithandwa sakhe abasuka kude naso.
Lo mgadli wasePortugal ubehamba ngemoto nomfowabo naye ongumdlali webhola u-Andre, oneminyaka engu-26, naye washona kule ngozi.
Kukholakala ukuthi kuqhume isondo imoto yabe seyiphaphalaza qede yagqamuka amalangabi.
UDiogo Jota ubesanda kushada noRute Cardoso, unina wezingane zakhe ezintathu.
Ingozi yenzeke ku-A-52 esifundazweni saseZamora eSpain.
Lo mgwaqo oseSpain uyindlela esetshenziswa abashayeli abasuka enyakatho yePortugal.
Abezimo eziphuthumayo esifundeni saseCastilla naseLeon bakuqinisekisile ukushona kwalaba badlali ababili.
“Igumbi lezimo eziphuthumayo le-1-1-2 eCastilla naseLeón lithole izingcingo ezimbalwa ezibika ngengozi yemoto ku-Km. 65 we-A-52, kumasipala waseCernadilla, eZamora.
“Imoto kubikwa ukuthi ibandakanyeke engozini ibivutha” kufundeka isitatimende sabezimo eziphuthumayo.
“Abezimo eziphuthumayo bazise amaphoyisa omgwaqo aseZamora, iZamora Provincial Council Fire Brigade, neSacyl Emergency Coordination Centre (CCU) ngale ngozi.
“Kusuka lapho, kuthunyelwe iMedical Emergency Unit (UME) nePrimary Care Medical Staff (MAP) yaseMombuey Health Centre.
“Kube sekuqinisekiswa ukushona kwabantu ababili endaweni yesigameko.”.
Ukushona kwakhe kuqinisekiswe nguPedro Proenca, inhloko yePortuguese Football Federation.
Esitatimendeni uthe: “IPortuguese Football Federation nalo lonke ibhola lasePortugal life olwembiza ngokushona kukaDiogo Jota no-André Silva, namhlanje ekuseni, eSpain.
“Ngaphezu komdlali omangalisayo, uDiogo Jota ubengumuntu onobuntu, ohlonishwa yibo bonke ozakwabo nezimbangi zakhe.
“Ubengumuntu onenjabulo futhi obehlezi efuna ukubona abaseduze naye bejabule.”
Lisenethini.com
