Ezokungcebeleka

Kuphele ubumpohlwa kumlingisi owakhetha ebhentshini

Mleven kaZikiza

BUPHELILE ubumpohlo kuKininonke “Kini” Shandu, ongumlingisi womdlalo wakuthelevishini Umkhokha.

UKini ugcagcelwe ngokweSintu ngowakwakhe uNkk Andile Khanyile-Shandu, endaweni yaseNgqutshini, eGingindlovu ngempelasonto.

Lo mshado oqhutshwe ngokwenkolo yobuNazaretha, njengoba lezi zithandani zikhonza kuleli bandla lasohlangothini lwaseBuhleni.

Ubuhanjelwe yizicukuthwane ezehlukene okubalwa kuzona osaziwayo, osopolitiki namalungu omphakathi.

Bekungakapheli sikhathi eside uKini, olingisa indawo kaNdlovu, elobole wakhehla lesi sinqandamathe sakhe asikhetha ebhentshini enkonzweni.

Kwenzeka lokhu ngaphambi kokuba bahlanganiswe ngokwenkolo eBuhleni, eNanda, ngaphansi kweNkosi uMduduzi “Nyazilwezulu” Shembe.

UKini ubuye abe ngusomabhizinisi nomethuli wezinhlelo njengoba eke wethula iDaily Thetha kuSABC1, wasebenza nasemzazweni iGagagasi FM.

Uthathe ithuba waqonda kuFacebook wabonga bonke abamesekile.

“Ngiswele imilomo eminingi ukubonga wonke umuntu osesekile usuku lethu lwaba yimpumelelo uma ngingabala ngamunye namunye ngizobheda kube khona engimshiyakho ebe edlale indima enkulu. Mina noMkami siyabonga kakhulu siwumndeni omusha wezingane. Sithanda ukunibonga nonke ngenikwenzile kithina,” kusho uKini.

Phakathi kosaziwawo abebehambele lo mcimbi, obekufinywa ngendololwane kuwona, kubalwa uXolani Mcineka weMpucuzeko Maskandi Festival, uZwakele Mncwango ongumholi we-Action SA KwaZulu-Natal, nabanye abaningi.

Related Articles

Back to top button