Kuboshwe abokufika namabhokisi agcwele amaphilisi ocansi
Sane Mseleku
KUSHAQWE amabhokisi angu-200 egcwele amaphilisi ayizikhuthazi ocansini nokukhulisa induku.
Kuthe kusabatshazwa lokho kwavundululwa amanye amabhokisi angu-300 abegcwele ukhilimu wobuso nomzimba konke okungagunyaziwe.
Umnikazi wendawo uboshiwe ngokuphula umthetho weMedicine and Related Substances Act (Act 101 of 1995) kanye nowe Foodstuffs, Cosmetics, and Disinfectants Act (Act 54 of 1972).
Lo mkhankaso wamaPhoyisa kaMaspala weTheku obuholwa uBrigadier Khuzwayo
ubuqonde ngqo kubantu abakuleli ngokungemvume nezephulamthetho.
Kwenzeka lokhu bekuseshwa eMngeni emgwaqeni uMay, kwatholakala namaChina awu-5 nabaseMalawi abaw-2 abangenayo imvume yokuba kuleli.
Kwaphinda Salon yokuzicwala izinwele esemgwaqeni u-Anton Lembede, kwatholakala abangu-25 abahlulekile ukukhipha amaphepha abagunyazayo ukuba kuleli.
Emuva kokuya koqinisekisa eHome Affairs abawu-22 bagcine ngokuboshwa kwazise bangene kuleli ngokungemthetho kwathi abathathu badedelwa.
Lo mshikashika ubuqhutshwa ekuseni ngoLwesithathu uBrigadier Khuzwayo.
Bonke abasolwa bagcinwe esiteshini samaphoyisa eDurban Central kusaqhutshekwa ngophenyo ngabo.
Kuboshwa labasolwa nje idolobha laseThekwini lisanda kwamukela amaphoyisa oMkhandlu amasha sha kulo angaphezulu kwa-500.
La maphoyisa azoqinisekisa ukuthi izivakashi kuleli dolobha ziphephile kulama holidi kaKhisimusi.
Ukutshalwa kwala maphoyisa kuza emuva kokumenyezelwa kwezimoto ezingaphezulu kwa-150 ezizosiza ukwenza umsebenzi wokulwa nobugebengu ube lula.
