Kuboshwe abakwaSassa ezinsolweni zokweba uR260 million
Liyah Mseleku
BEKUNGATHI kuwine iqembu lebhola elithandwa uwonkewonke kushaywa amakhwela abanye bekikiza kuboshwa abasebenzi bakwaSassa eGoli.
Laba basebenzi abathathu baboshwe ngoLwesihlanu emini kwa bha emahhovisi asemgwaqweni uDe Villiers enkabeni yedolobha eGoli.
Baphume sebegaxwe amasongo kaSigonyela bazifihle nobuso ukungabonwa umphakathi.
Laba solwa bamataniswa nemali engaphezulu kwaR260 million eyehliswe ngomlenze ngabahlomula ngamakhadi ezipoki.
Ukuboshwa kwalabasolwa kuyingxenye yomsebenzi wamaphoyisa wokuthungatha bonke abamataniswa nale nkohlakalo kanti kuthiwa kukhona abanye abasazingelwa ngalo lolu daba.
Kuvele ukuthi esinye zezizathu ezidale ukuthi amaphoyisa alisukumele phezulu lolu daba wukuboshwa sowesifazane odabuka e-Ethopia esitolo sokuthenga ukudla iShoprite.
Kuthiwa uzame ukukhipha imali yesibonelelo sikahulumeni (SASSA) esebenzisa amakhadi ahlukahlukene.
Uvinjwe abasebenzi bakulesi sitolo kwasuka esinamathambo kwabizwa namaphoyisa. Emuva kokumhlaba ngimibuzo ugcine ekhipha omunye wesilisa asebemzisana naye kulo mkhonyovu.
Lo wesilisa ubanjwe namakhadi angu-139 zamkhalela naye.
Okhulumela amaphoyisa eGauteng uLieutenant Colonel Mavela Masondo uthe iningi labasolwa abebefuneka bebese msebenzini ngoLwesihlanu.
“Sibophe abasebenzi abathathu bakwaSassa. Sibabophele inkohlakalo, abesifazane ababili nendoda eyodwa,” usho kanje.
“Leli cala liqale ngoFebhuwari. Khumbula ukuthi ngoFebhuwari sabopha abane eDlamini kwakungamadoda amabili nabesifazane ababili. Oyedwa walamadoda udabuka e-Ethopia,” kunaba uNdaba.
