Ezokungcebeleka

Ithemba kuvulwa isikhungo somculo esavalwa sekudliwe izigidi eKZN

Kwande kaZikiza

KUBE injabulo yodwa kuvulwa isikhungo i-KZN Music House eyavalwa ngenxa yezinsolo zokudliwa kwezimali eminyakeni eyishumi edlule.

Lesi sikhungo esisenkabeni yeTheku sasungulwa ngo 2009 siphethwe  uMbongeni Ngema ongasekho emhlabemi ngenhloso yokugcina amaciko akulesi sifundazwe engafudukeli eGoli.

Ukubhubhudlwa kwemali kwenza kwaba nengcindezi yamaqembu epolitiki ayefuna kuphenywe ngomkhonyovu owawudla lubi kulesi sikhungo sağcına ngokuvalwa.

Ngesikhathi sisasebenza amaciko anjengeLadysmith Black Mambazo, Salif Keita, Afrosoul, DJ Happygal, Mfiliseni Magubane, Zahara, Sosha noBullistic aqopha imisebenzi yabo kulesi sikhungo.

USabelo Ngema oyilungu le-Afrosoul uthe bayajabula ukubona le ndawo isivulwa.

“Kuzokwehla umthwalo wokuthi amaciko athuthele eGoli afike aguge iphakethe ekhokhela izindleko zasestudio ezibizayo.

Istudio sethu siseqophelweni eliphezulu kanti amaciko akithi kulindeleke akhiphe ulozolo lwezingoma,” kusho uNgema.

UT’zozo Zulu ongumculi obuye abe nguSihlalo weCultural and Creative Industries Federation of South Africa (CCIFSA) uthe bazokwenza konke okusemandleni ukuthi konke kuhamba ngohlelo.

Uthe okubajabulisayo ukuthi amahhovisi ale nyunyana yabo azoba semagcekeni alesi sikhungo, okuzokwenza ukuthi baqashwe ngeso lokhozi labo abajwayele ukuthatha ngozwane.

UT’zozo uveze ukuthi kusosungulwa i-Podcast ezobe ikhuluma ngabaculi ne-Academy ezokhiqiza o-DJ bangomuso.

I-KZN Music House ixhaswe uMnyango wezoBuciko neZemidlalo.

 

 

 

Related Articles

Back to top button