Bazonekela izwe ngokwabahlukanisa nabayeni babo
OSAZIWAYO asebadivosa nabayeni babo bazothola ithuba lokuneka konke okwenzeka emshadweni yabo ohlelelweni olusihloko United nolubhekwe ngabomvu kwiShowmax.
Luzokwethulwa uRelebogile Mabotja onguprojusa ohlonishwayo nosenqobe izindondo eziningi ngokuba umethuli wezinhlelo.
Phakathi kosaziwayo abazobonakala uNorma Mngoma, uBeverly Steyn noNonku Williams abadlala ohlelweni iReality TV, abalingisi uDawn Thandeka King, Mona Monyane nosomabhizinisi uPalesa Madisakwane, Zandi Nhlapo noSonia Booth.
UNorma ungosomabhizinisi kulindeleke adedele amabhomu ngomshado wakhe nalowo owayenguNgqonqoshe eminyangweni eyehlukene eNingizimu Afrika uMalusi Gigaba.
Bahlukana kabuhlungu njengoba uNorma waba ngomunye wofakazi kwiZondo Commission eyayiphenya ibheshu labo ababethinteka ekukhwabaniseni imali yabantu bakuleli beyidla nezimpunyela zakwaGupta.
Ngesikhathi besathandana kumnandi, babengapheli emaphepheni emigosi njengoba kwakuvela ukuthi uGigaba uyamjolela uNorma.
UNonku noBeverly nabo bayaziwa ngokuthanda ukugqamisa ubukhazikhazi bempilo yabo kwiThe Real Housewives of Durban nakwiThe Real Housewives of Cape Town ngokwehlukana.
UMona yena wake waba sematheni ngomzabalazo wokuhlukanisa nomyeni wakhe angumlingisi njengaye uKhulu Skenjana.
Kwavela ukuthi uKhulu wayenqaba ukusayina amaphepha edivosi okuyinto eyathatha iminyaka emine.
UPalesa, ongumlingisi nosake waba umethuli wezinhlelo kumabonakude, yena udume ngokuthi unengane nonontandakubukwa uSomizi Mhlongo.
UZandi yena wake wathandana noBob Mabena ongasekho emhlabeni kanti uSonia waba sematheni ngesikhathi ebamba oqotsheni isihlabani sebhola uMathew Booth ngomjolo waso nentokazi eyayimjimisa.
Echaza ngohlelo uRelebogile ushaye ngamafuphi wathi:
“Zizokhala kulolu hlelo. Esizokhuluma nabo bazobe bechaza ngobuhlungu ebebehlala nabo bengakadivosi”
“Bazobuye basebenzise ithuba lokululeka labo abasazimisele ukungena emishadweni”
Lolu hlelo angeke lube nehaba kodwa elikuhlosile ukukhulisana nokusizana ekuphumeni ebuhlungwini,” usho kanje. Uhlelo luqala ngomhla ka-24 kule nyanga.
NB: Marketing & Advertising WhatsApp/Call-073 062 1169
